ԵՐԵՎԱՆ, 3 օգոստոսի — Sputnik. Օտարերկրյա պետություններում ՀՀ դիվանագիտական և հյուպատոսական ներկայացուցչությունների կողմից իրականացվող տնտեսական աշխատանքներն այսուհետ կլինեն ավելի համակարգված։ Կառավարությունն ուսումնասիրել և առաջարկություններ է ներկայացրել, որոնք այսօր հաստատվեցին համապատասխան որոշմամբ։
«ՀՀ տնտեսության զարգացման խթանումը գրեթե անհնարին է առանց օտարերկրյա ներդրումների ներգրավման, արտահանման և զբոսաշրջության զարգացման»,– ասված է ՀՀ կառավարության որոշման նախագծում։
Որոշման համաձայն`յուրաքանչյուր դեսպանության համար կմշակվեն տարեկան գործողությունների և ակնկալվող արդյունքների ծրագրեր։
Նախագծով սահմանվում են նաև տնտեսական առումով Հայաստանի համար հեռանկարային գործընկեր երկրների ցանկը.
1. Ռուսաստանի Դաշնություն
2. ԱՄՆ
3. Չինաստան
4. Իրան
5. Վրաստան
6. ԱՄԷ
7. Ֆրանսիա
8. Գերմանիա
9. Իտալիա
10. Կանադա
11. Լիբանան
12. Բենիլյուքսի երկրներ
Ցանկը վերջնական չէ և հետագայում կարող է վերանայվել։ Կառավարության նիստից հետո լրագրողներին հայտնեց Տնտեսական զարգացման և ներդրումների նախարարի տեղակալ Գարեգին Մելքոնյանը։
Հարցին, թե ինչու է կառավարությունը թիրախային երկրների ցանկում ԵԱՏՄ–ից միայն ՌԴ–ը նշել, Գարեգին Մելքոնյանը նշեց. «Ցանկը կազմվել է միայն առավել թիրախային երկրներից։ Հաշվի է առնվել տվյալ երկրում ՀՀ դիվանագիտական ներկայացուցչության կարողությունները, առևտրատնտեսական հարաբերությունների զարգացման պոտենցիալը, համայնքի առկայությունն ու կարողությունները»։
Երկրների ընտրությունը ԵԱՏՄ–ում լինել–չլինելով պայմանավորված չէ, նշեց փոխնախարարը։
