ԵՐԵՎԱՆ, 1 օգոստոսի – Sputnik. Զինված հանցագործը որոշ մարդկանցից գումար էր պահանջում, լրագրողներին պատմել է Շամիրամ գյուղի բնակիչ Մրազ Նաբոյանը։
Այսօր գյուղում հանգուցյալների հիշատակման օրն էր։ Մարդիկ նստած են եղել սեղանի շուրջ, երբ ներս է մտել մի երիտասարդ ու հրաձգություն սկսել, պատմել է ականատեսը։
«Երեք մարդ տեղում մահացավ, մեկը` հիվանդանոցում, ևս 5–6 մարդ վնասվածք է ստացել»,– պատմեց Նաբոյանը։
Տղամարդիկ ու կանայք, եզդիների սովորության համաձայն, առանձին էին նստած։ Հանցագործը, որը, Նաբոյանի խոսքով, մի 40 տարեկան էր երևում, կրակ է արձակել միայն տղամարդկանց ուղղությամբ։ Մահացածներից երկուսը Շամիրամի բնակիչներ էին, ևս երկուսը Ռուսաստանից էին ժամանել։
Նաբոյանը վկայում է, որ հանցագործը սկզբում կրակեց մի մարդու վրա, որը մուտքի մոտ հանդիպեց նրան, հետո անկանոն հրաձգություն սկսեց ինքնաձիգից։
Գյուղի բնակիչը պատմեց, որ հանցագործին մոտ գտնվող մարդիկ լսել են, որ նա ինչ-որ բան էր ասում փողերի մասին, ինչ-որ բան էր պահանջում։
Շամիրամ գյուղի գերեզմանոցում հրաձգության մասին ահազանգը ոստիկանությունը ստացել է օգոստոսի 1–ին ժամը 10:40–ին։ Կասկածյալին փնտրում են, նրա անձը հաստատված չէ։
