ԵՐԵՎԱՆ, 31 հուլիսի — Sputnik. Բասկետբոլի Հայաստանի ֆեդերացիայի նախագահ Հրաչյա Ռոստոմյանն այսօր անդրադարձել է արդեն ավարտված ու գալիք մրցաշարերին:
Անդորայում կայացած մինչև 16 տարեկանների Եվրոպայի C դիվիզիոնի առաջնությունում Հայաստանի հավաքականը հաղթանակներով ուրախացրեց հայ երկրպագուներին, իսկ եզրափակիչում Արեգ Վաթյանի թիմը 88:70 հաշվով հաղթելով Ջիբրալթարի թիմին՝ դարձավ մրցումների հաղթող: Ջիբրալթարում էլ աղջիկների Հայաստանի նույն տարիքային հավաքականը կիսաեզրափակիչում սկզբունքային մրցավեճում հաղթանակի հասավ Ադրբեջանի թիմի նկատմամբ, իսկ եզրափակչում մերոնք իրենց առավելությունը 63:44 հաշվով դրսևորեցին Մալթայի ընտրանու նկատմամբ:
Հրաչյա Ռոստոմյանն այս հաղթանակները վերագրեց կատարված աշխատանքին ու բասկետբոլի մեր հավաքական թիմերի խաղացողների վարպետությանը։
«Հայաստանում կարծիք է ստեղծվել, որ մենք կարող ենք զարգացնել միայն մենապայքարային մարզաձևերը, բայց, ինչպես տեսնում եք բասկետբոլիստների օրինակով, մենք ունենք ներուժ նաև խաղային ձևերը զարգացնելու համար: Մենք երկար ժամանակ ոչինչ չենք արել, իսկ հիմա կանոնավոր մասնակցելով նման մրցաշարերի՝ կարող ենք հանդես գալ նաև ավելի բարձր դիվիզիոններում»։- ասաց նա:
Բասկետբոլային բումը Հայաստանում սկսվեց «Հատիս» թիմի վերստեղծումից հետո, եղավ նաև «Ուրարտուի» մասնակցությունը Ռուսաստանի առաջնությանը: Սակայն փաստաթղթային խնդիրների պատճառով մի քանի բասկետբոլիստներ մեր թիմերի կազմում հանդես գալ չկարողացան։
«Հիմա արդեն փաստաթղթերի հետ կապված խնդիրներ չկան: Մենք ունենք և ներսի և դրսի շատ լավ խաղացողներ, որոնք տարբեր տարիքային հավաքականներում են խաղալու: Հայաստանի այս տարվա առաջնությունն էլ անհամեմատ ուժեղ է լինելու»- նշեց Հրաչյա Ռոստոմյանը:
Պարզ է, որ հաղթանակները ոգևորում են, և հիմա բոլորն արդեն հաղթանակներ են ակնկալում Հայաստանի տղամարդկանց ազգային հավաքականից, որն օգոստոսի 2-ին Սլովակիայի ընտրանու դեմ անցկացնելու է առաջին հանդիպումը աշխարհի առաջնության ընտրական փուլի շրջանակներում։
«Մեր խմբի ֆավորիտն, իհարկե, Բոսնիայի և Հերցոգովինայի թիմն է, որի կազմում հանդես են գալիս շատ բարձրակարգ բասկետբոլիստներ, բայց, անկախ ամեն ինչից, նրանց և շվեդների դեմ պայքարելու ենք մինչև վերջ: Իսկ սլովակների հետ մեկնարկային խաղն առանձնահատուկ կարևոր է մեզ համար ու խաղալու ենք հաղթանակի ակնկալիքով»,- ավելացրեց բասկետբոլի ֆեդերացիայի նախագահը:
