ԵՐԵՎԱՆ, 30 հուլիսի — Sputnik. Աշխատանքի միջազգային կազմակերպության գնահատականով աշխարհում թրաֆիքինգի՝ հարկադիր աշխատանքի, զոհ է դարձել արդեն 21 միլիոն մարդ, այդ թվում՝ կանայք և երեխաներ։ Թրաֆիքինգի զոհերն իրենց շահագործողների կողմից հավաքագրվում ու սեռական և աշխատանքային շահահործման են ենթարկվում ինչպես իրենց հայրենիքում, այնպես էլ դրա սահմաններից դուրս։
ՄԱԿ գրասենյակի հրապարակած տեղեկատվության համաձայն, զոհերի մեկ երրորդը երեխաներ են, 71%-ը՝ կանայք։ Թրաֆիքինգի դեմ պայքարի ՄԱԿ- ի կոնվենցիաները Հայաստանը վավերացրել է 2003թ-ին, որից հետո համապատասխան հոդված ավելացվեց նաև ՀՀ Քրեական օրենսգրքում։ Այսօր հայաստանում թրաֆիքինգի դրսևորում են համարվում և քրեորեն պատժելի են աշխատանքային ու սեռական շահագործումը, ինչպես նաև մարդու օրգանների ու հյուսվածքների վաճառքը։
ՀՀ ոստիկանության հրապարակած տվյալներով հանրապետությունում այս տարի արդեն գրանցվել է թրաֆիքինգի 7 դեպք, որից 3-ը՝ սեռական, 4-ը՝ աշխատանքային շահագործման դեպքեր են։ Սեռական շահագործման զոհերը կանայք են։ Շահագործման մի դեպքն իրականացվել է ՀՀ-ում, 1-ը՝ Թուրքիայում և ԱՄԷ-ում։ Իսկ աշխատանքային շահագործման 4 դեպքերն էլ կատարվել են Հայաստանի Հանրապետությունում։
