Արմենուհի Մխոյան, Sputnik.
Գևորգի մասին ավելի շատ սկսեցին խոսել, երբ վերջերս համացանցում հայտնվեց մի տեսահոլովակ, որտեղ նա կարողանում է 6 րոպեում 600 անգամ «21» խաղալ։ Տղան մեր ներկայությամբ ևս փորձեց այդ հնարքը կատարել:
Սիրած ֆուտբոլիստները Զինեդին Զիդանն ու Հենրիխ Մխիթարյանն են. վերջինիս Գևորգը ցանկանում է նմանվել: Նա առաջին քայլերն է կատարում ֆուտբոլում. երկու տարի է, ինչ մարզվում է Գյումրու «Շիրակի» նախկին ֆուտբոլիստ Արա Մկրտչյանի մոտ:
Գևորգն իր տարիքի համեմատ չխոսկան ու բավական լուրջ է: Փոխարենը մարզիչը վստահեցնում է՝ տղան հաջողության կհասնի իր բնածին տաղանդի ու քրտնաջան աշխատանքի շնորհիվ: «Այդ հատկանիշներն էլ Գևորգի մոտ առկա են, իսկ ի շնորհիվ «Շիրակ» ֆուտբոլային ակումբի ղեկավարության, մենք ունենք բոլոր նպաստավոր պայմանները` հայկական ֆուտբոլի համար լավագույն կադրերը պատրաստելու: Ֆուտբոլը թիմային խաղ է, և Գևորգի հաջողությունը ֆուտբոլում կախված է նրանից, թե թիմում Գևորգն ինչպես իր ունակությունները կներդնի»,- նշեց մարզիչը՝ փաստելով, որ ակադեմիայի փոքրերի խմբում լավ երեխաներ շատ կան:
Խոսելով տղայի «հնարքների» մասին Արա Մկրտչյանը փաստեց՝ «Այս տարիքի երեխաներից քչերն են կարողանում գնդակն այդպես վարպետությամբ «իրենցով» անել: Շատ լավ է, բայց լավ ֆուտբոլիստ լինելու համար դա դեռ քիչ է, իսկ Գևորգի պարագայում այլ է ՝ բացի հնարքներից նա նաև լավ ֆուտբոլ է խաղում: Վերջերս «Շիրակ» ֆուտբոլային ակումբի մանկապատանեկան առաջնության ժամանակ խումբը չեմպիոն հռչակվեց. Գևորգն այդ թիմի առանցքային խաղացողներից էր։ 5 խաղում նա 12 գնդակ է խփել և իր գործողություններով նպաստել թիմի հաղթանակին»,-հավելեց մարզիչը:
Ֆուտբոլի հանդեպ սերը չի խանգարում նրան գերազանց սովորել դպրոցում։ «Ազատ ժամանակս էլ եմ սիրում ֆուտբոլ խաղալ, բայց դպրոցն էլ եմ սիրում, հատկապես` մաթեմատիկան ու մայրենի լեզուն»,-ասում է Գևորգն ու շտապելով ավելացնում՝ «հեծանիվ քշել ու սպիներ խաղալ էլ եմ սիրում: 5 տարեկանից եմ ֆուտբոլ պարապում, փորձեցի «21» անել ու ստացվեց»,-նշում է Գևորգն՝ ավելացնելով՝ Մխիթարյանը լավ պասեր է տալիս, Զիդանը՝ լավ է խփում:
Գնդակի փոքրիկ իշխանը երազում է հայտնի ֆուտբոլիստ դառնալ ու իր նպատակին հասնելու համար՝ ոչ միայն հաճախում է Գյումրու ֆուտբոլի ակադեմիա, այլ նաև պարապում հայրիկի հետ: Տղան ֆուտբոլի հետ կապված ցանկացած վարժանք ու պարապմունք սիրով ու մեծ նվիրումով է անում:
