ԵՐԵՎԱՆ, 28 հուլիսի — Sputnik. Հուլիսի 23-ին Մանուկ Սիմոնյանի կինը դիմել է ոստիկանություն ու հայտնել, որ ամուսինը հուլիսի 22-ին, ժամը 22։00-23:00-ի սահմաններում դուրս է եկել տնից և այլևս չի վերադարձել:
Կինը նաև հայտնել է, որ ամուսնուն տան բակից կանչել է ինչ-որ անծանոթ տղամարդ, որից հետո նա դուրս է եկել տնից՝ առանց ասելու, թե ուր է գնում և այլևս չի վերադարձել:
Արմավիրի մարզպետի խորհրդականի սպանության գործից նոր մանրամասներ է հրապարակել ՀՀ քննչական կոմիտեն։ Ըստ հաղորդագրության՝ ամուսինը պարբերաբար բռնության է ենթարկել կնոջը։
Հուլիսի 22-ի առավոտյան կնոջ և ամուսնու միջև կրկին վիճաբանություն է տեղի ունեցել, որից հետո ամուսինը քնել է, կինն էլ փայտ կոտրելու կացնով հարվածել է քնած ամուսնուն։ Ամուսնուն սպանելուց հետո կինը զանգահարել է որդուն և տուն կանչել, ապա՝ միասին դիակը տեղափոխել և թաքցրել են Արմավիրի մարզի Դալարիկ գյուղի մոտակա ձորերում:
Այստեղ էլ հուլիսի 25-ին, 23.30-ի սահմաններում իրավապահները հայտնաբերել են 1965 թ. ծնված Մանուկ Սիմոնյանի դիակը։
Սիմոնյանի կինն ու որդին ձերբակալված են, նախաքննությունը շարունակվում է։
