Երևանի Արգենտինայի հրապարակում (Չարենց-Սայաթ Նովա խաչմերուկ) այսօր վաղ առավոտից իսկական ջրհեղեղ էր: Այդ են վկայում բնակիչների նկարած կադրերը, որոնք նրանք տրամադրել են Sputnik Արմենիային:
«Փողոցով իսկական գետ էր հոսում: Հետո ինչ-որ մարդիկ եկան, գործ արեցին ու մինչև հիմա ջուր չունենք»,- պատմեց բնակիչներից մեկը:
Ի դեպ, նրա խոսքով, ջրհեղեղները Չարենցի փողոցի այս հատվածում հազվադեպ երևույթ չեն: Պարբերաբար, վթարների հետևանքով, այս կամ այն հատվածում դուրս հորդացող ջրերին բնակիչներն արդեն սովորել են, բայց փողոցի երթևեկելի հատվածում ցայտող ջրի տեսարանն իսկական անակնկալ է եղել:
«Վիոլիա ջուր» ընկերությունում տեղի ունեցած վթարի մասին տեղյակ չեն: Ընկերության մամուլի հետ կապերի պատասխանատու Մուրադ Սարգսյանը մեր հարցմանն ի պատասխան ասաց, որ բնակիչներից ահազանգ չեն ստացել և, մեր միջոցով տեղեկանալով վթարի մասին, խոստացավ հայտնել համապատասխան ստորաբաժանումներին:
