ԵՐԵՎԱՆ, 27 հուլիսի — Sputnik. Կանադայի Հայ ազգային կոմիտեն (ANCC) ապշած է Տորոնտոյում գտնվող INKAS Armored Vehicle Manufacturing կայանից դեպի Ադրբեջան ռազմական տեխնիկա արտահանելու մասին Կանադայի կառավարության որոշումից, տեղեկացնում է Asbarez-ը։
Ավելի վաղ CBC News կանադական ռադիոհեռարձակող կորպորացիան հայտնել էր, որ տեղական INKAS Armored Vehicle Manufacturing ընկերությունը պայմանագիր է կնքել Ադրբեջանի ՆԳՆ–ի հետ` հետևակի համար զրահամեքենաների (Armored Personnel Carriers – APC) մատակարարման վերաբերյալ։ Ընկերության տվյալների համաձայն` մի քանի մեքենա արդեն Ադրբեջանում են։ INKAS–ը պայմանագիր էր կնքել նաև «տեղում»` ներկրողի տարածքում APC-ի արտադրման վերաբերյալ։
Sputnik Արմենիայի թղթակցի հետ զրույցում, մեկնաբանելով Ադրբեջանին կանադական զրահամեքենաների մատակարարման հարցը, ՀՀ ՊՆ մամուլի քարտուղար Արծրուն Հովհաննիսյանն ասաց, որ դրանք նախատեսված են ոստիկանական կառույցների համար։ Ադրբեջանը նախկինում ևս նման մեքենաներ էր արտադրում, ընդ որում` հարավաֆրիկացիների հետ, բացատրեց նա։
Կանադահայերն, այդուամենայնիվ, մտահոգված են։
Կանադայի միջազգային առևտրի նախարար Ֆրանսուա–Ֆիլիպ Շամպանին հասցեագրված նամակում ANCC–ը կոչ է արել Կանադայի կառավարությանն՝ անհապաղ դադարեցնել Ադրբեջանին զենքի մատակարարումը և քայլեր ձեռնարկել «այդ սխալ որոշումը» չեղարկելու ուղղությամբ։
«Վտանգավոր սպառազինության մատակարարումն այնպիսի երկրներ, ինչպիսին Ադրբեջանն է, խափանում է Կանադայի զենքի արտահանման հիմնական նորմերը և լուրջ վտանգ է ներկայացնում ներքին և տարածաշրջանային կայունության համար»,– նշեց ANCC նախագահ Շահեն Միրաքյանը։
Ադրբեջան ռազմամթերքի արտահանումը թույլատրելով` Կանադան նպաստում է հակամարտության գոտում բռնության աճին։ Նման որոշումը հակասում է Կանադայի` հակամարտության խաղաղ կարգավորմանն ուղղված ԵԱՀԿ ՄԽ ջանքերին լիիրավ աջակցելու պարտավորություններին, ընդգծել են ուղերձի հեղինակները։
Նշենք, որ ավտոմեքենաներից մեկի նկարագրության մեջ նշվում է, որ այն կարող է կիրառվել բանակային ստորաբաժանումների, հատուկ նշանակության զորքերի և այլ ուժային կառույցների կողմից։
