ԵՐԵՎԱՆ, 27 հուլիսի — Sputnik. Shamshyan.com-ի տեղեկություններով Արմավիրի մարզպետի խորհրդական Մանուկ Սիմոնյանի սպանության գործով ձերբակալվել է նրա որդին՝ 23-ամյա Նորիկ Մանուկի Սիմոնյանը և կինը։
Նախնական տեղեկություններով`սպանությունը կատարվել է իրենց տանը, որից հետո կինն ու որդին Մանուկի դին կապել են երկաթե լարերով, այնուհետև պոլիէթիլենային տոպրակներով փաթաթել և, մութն ընկնելուն պես, դուրս են բերել տանից և բերել Դալարիկ գյուղ ու շպրտել ամայի տարածքում:
Ոստիկանները հայտնաբերել են նաև հանցագործության գործիքը՝ կացինը, որով սպանվել է Մ. Սիմոնյանը:
2017 թվականի հուլիսի 25-ին՝ ժամը 23.30-ի սահմաններում, Արմավիրի մարզի Մյասնիկյան-Դալարիկ ճանապարհի 3-րդ կմ-ից դեպի աջ ընկած՝ մոտ 300 մ հեռավորությամբ գտնվող «Դալարիկի ձոր» կոչվող տարածքում, հայտնաբերվել էր 1965 թ. ծնված Մանուկ Սիմոնյանի դիակը՝ փաթաթված և կապկպված:
ՀՀ քննչական կոմիտեն էլ հայտնում է, որ դեպքի առթիվ հարուցված քրեական գործով ձեռնարկված մեծածավալ քննչական և օպերատիվ-որոնողական համատեղ գործողությունների ընթացքում առաջ են քաշվել և ստուգվել մի շարք վարկածներ: Արդյունքում՝ փաստական տվյալներ են ձեռք բերվել սպանության շարժառիթի և ենթադրյալ հանցագործություն կատարած անձանց շրջանակի վերաբերյալ: Մեկ անձ ձերբակալվել է:
