ԵՐԵՎԱՆ, 26 Հուլիս — Sputnik. Երևանի Աջափնյակ, Ավան, Արաբկիր, Դավթաշեն, Էրեբունի, Նոր Նորք, Նորք-Մարաշ, Նուբարաշեն և Քանաքեռ-Զեյթուն վարչական շրջաններում զինվորական ծառայության հերթափոխի խորհրդանշական փոխանցման միջոցառումներին մասնակցել են նաև Երևանի քաղաքապետի տեղակալ Դավիթ Օհանյանը, ԱԺ պատգամավոր Ռոբերտ Սարգսյանը, վերոնշյալ վարչական շրջանների ղեկավարները և տարածքային զինվորական կոմիսարները: Այս մասին տեղեկացնում են Երևանի քաղաքապետարանի մամուլի ծառայությունից։
Ողջունելով զորացրված զինծառայողներին և բարի ծառայություն ու բարի վերադարձ մաղթելով նորակոչիկներին` փոխքաղաքապետ Դավիթ Օհանյանը նշել է, որ բանակային հերթափոխի փոխանցման խորհրդանշական այս նախաձեռնությունը դառնալու է ավանդական՝ համալրելով բանակ-հասարակություն կապի ամրապնդման ուղղությամբ Երևանի քաղաքապետարանի կողմից իրականացվող ծրագրերի շարքը: Փոխքաղաքապետը նաև վստահեցրել է, որ Երևանի քաղաքապետ Տարոն Մարգարյանի նախաձեռնությամբ արդեն 5-րդ տարին անընդմեջ երևանաբնակ զինծառայողների ծնողների սահմանամերձ զորամասեր այցելությունների ծրագիրը ևս լինելու է շարունակական՝ հավելելով, որ երևանաբնակ զինծառայողների ընտանիքները շարունակելու են մնալ քաղաքային իշխանությունների մշտական ուշադրության կենտրոնում:
Նորակոչիկներն էլ խոստացել են պատվով շարունակել զորացրված ընկերների գործը, իսկ զորացրվածներն իրենց հերթին վստահեցրել են, որ անհրաժեշտության դեպքում պատրաստ են բանակում ստացած զինվորական հմտությունները կրկին ծառայեցնելու հանուն Հայրենիքի պաշտպանության:
Խորհրդանշական միջոցառման շրջանակում Հայ առաքելական եկեղեցու հոգևոր սպասավորները կատարել են նորակոչիկների օրհնության կարգ:
