«Առավոտ». Թալիշը վերակառուցվում է
«2016 թվականի ապրիլյան պատերազմի ընթացքում լուրջ վնասներ կրած Թալիշը վերականգնվում է։
Թալիշում ականատես դարձանք, թե ինչպես են շինարարական ինտենսիվ աշխատանքներ իրականացվում։ Այնտեղ կառուցվում են դպրոցի, մանկապարտեզի, համայնքապետարանի, հանդիսությունների սրահի շենքերը։ Արդեն իսկ կառուցվել է ջրամատակարարման նոր ցանցը։ Տեղեկացանք, որ Թալիշում 10 ընտանիք է բնակվում։ Թալիշում շարժ կար, գյուղ մուտք գործելիս մի քանի տղամարդու հետ անգամ մանկահասակ տղա երեխայի նկատեցինք»,-գրում է թերթը։
«Իրավունք». «Երկիր Ծիրանիի» դժոխքային սցենարները գաղտնի՞ են
Թերթը գրում է, որ Զարուհի Փոստանջանի «Երկիր ծիրանի» կուսակցությունը Երևանի քաղաքապետարանի ավագանու նիստերը փորձեց դժոխքի վերածել, թեև քաղաքապետ Տարոն Մարգարյանը հակառակն էր ասում ՝ դժոխքի շունչ չի զգացել։
«Հետաքրքիր է՝ դժոխքային նոր սցենարներ կա՞ն աշնան համար, թե ոչ։ Զանգահարեցինք «Երկիր ծիրանի» կուսակցության անդամ Սեդա Մելիքյանին։ Վերջինս ասաց, որ կուսակցության անդամները հեռախոսով պարզաբանումներ չեն տալիս, իսկ եթե ասելու բան ունենան և նոր նախաձեռնություններ լինեն, մամլո ասուլիսով կհրապարակեն»,- տեղեկացնում է «Իրավունքը»։
«Հրապարակ». Դոն Պիպոն դիրքերն է ամրապնդում, նա չլսված բարձր գնով երկու տուն է գնել իր ծննդավայրում
«Հրապարակ» թերթը գրում է. «Իտալիայում բնակվող Արթուր Ասատրյանը՝ դոն Պիպոն, շարունակում է անշարժ գույք ձեռք բերել իր ծննդավայր Էջմիածնում: Քաղաքում գործող առեւտրի եւ սպասարկման մի շարք օբյեկտներ, որ վաղուց արդեն Ասատրյան ընտանիքի սեփականությունն են, շարունակում են համալրվել:
«Հերթական գործարքը, ճիշտ է՝ այնքան էլ արագ առաջ չի գնում, հատկապես Պիպոյի հետ կապված վերջին աղմկահարույց դեպքից՝ մահափորձի նախապատրաստությունից եւ դրա բացահայտումից հետո, բայցեւայնպես, առևտուրն արդեն ընթացք է ստացել: Մեր տեղեկություններով՝ Դոնը երկու մասնավոր տուն է գնել Էջմիածնի Արարատյան փողոցում՝ Մայր Աթոռի հարեւանությամբ: Եվ, քանի որ դրանք վանքապատկան տարածքում են, տանտերերն աստղաբաշխական գին են պահանջել: Տներից յուրաքանչյուրի համար Դոնը 100 հազար դոլարի կարգի գումար է վճարել՝ Էջմիածնում չլսված թվեր»:
Ըստ թերթի՝ դեռեւս տարիներ առաջ, երբ եկեղեցին իրեն պատկանող տարածքը «մաքրեց» բազմաթիվ շենք-շինություններից՝ վերադարձնելով իրեն հասանելիքը, խոսակցություններ եղան նաեւ այն մասին, որ հաջորդն այդ տներն են լինելու: Բնակիչների առաջարկած գինը, սակայն, եկեղեցուն «ձեռք չտվեց», և նա այն չգնեց՝ հավանաբար, սպասելով առատաձեռն մի բարերարի: Եվ, ահա, այդ օրը չուշացավ:
«Հրապարակ». Ժամանակակից հարսանիք է եղել՝ առանց «քյարթու» արարողակարգերի
«Հրապարակ» թերթը գրում է. «Հուլիսի 22-ին Երեւանի առաջին փոխքաղաքապետ Կամո Արեյանի որդու հարսանիքն էր: Հարսնացուն տղայի համակուրսեցին է: Այն կայացել է Դիլիջանի «Դոլմամա» ռեստորանային համալիրում:
Քաղաքական էլիտայից ներկա են եղել միայն Տարոն Մարգարյանը և ընտանիքի մտերիմ պաշտպանության նախարար Վիգեն Սարգսյանը: Քաղաքապետի տեղակալներն էլ կլինեին, բայց արձակուրդի մեջ են եղել:
Պատմում են, որ աշխույժ երիտասարդական, ժամանակակից հարսանիք է եղել՝ առանց «քյարթու» եւ ավանդական արարողակարգերի, անգամ խորովածի երգ-պարը չի եղել: Ամեն ինչ ճաշակով է եղել, ազգային տարրերով, բայց եվրոպական մոտիվներով: Հրավիրված են եղել ընտանիքի մտերիմները:
Երաժշտությունն ապահովել է «Միքայել Ոսկանյան եւ ընկերներ» ջազ բենդը: Կամո Արեյանի կինը միջոցառումների կազմակերպման ընկերություն ունի եւ անձամբ է կազմակերպել որդու հարսանիքը»:
