ԵՐԵՎԱՆ, 26 հուլիսի — Sputnik. Բլոգեր Ալեքսանդր Լապշինի խնդրանքն Ադրբեջանից Թել Ավիվ արտահանձնել հինգշաբթի կհասնի Իսրայելի արդարադատության նախարարություն` մեկնարկ տալով հանձման ֆորմալ գործընթացին, ՌԻԱ Նովոստիին հայտնել է իսրայելական Քնեսեթի պատգամավոր Քսենիա Սվետլովան։
Այսօր բլոգերի փաստաբան Էդուարդ Չերնինը հայտնել է, որ Լապշինը դիմում է ներկայացրել Իսրայել արտահանձման մասին։
Լապշինը, որին դատել են առանց Բաքվի հետ համաձայնեցնելու Արցախ այցելելու համար, ոչ միայն Ռուսասատնի, այլ նաև Իսրայելի քաղաքացի է։ Իսրայելի պաշտոնական ներկայացուցիչները հետևում էին գործընթացին և շարունակում են հայրենակցին հյուպատոսական աջակցություն ցուցաբերել։
«Ես անձամբ զանգահարել եմ մեր արտաքին գործերի նախարարության ներկայացուցիչներին, այդ թվում` հյուպատոսին։ Նա եկել է Լապշինի մոտ, թերթեր է լրացրել։ Դրանք արդեն վաղը փոխանցվելու են արդարատադության նախարարություն, և գործընթացը կմեկնարկի։ Չգիտեմ, ինչքան ժամանակ դա կտևի։ Մենք Ադրբեջանի հետ պայմանագիր չունենք, որքանով ես հասկացա։ Ամեն դեպքում Իսրայելը կանի ամեն հնարավոր բան, որ դա տեղի ունենա», – ասել է Սվետլակովան, որը հենց սկզբից գործունեություն է ծավալել բլոգերին պաշտպանելու նպատակով։
Իսրայելի ԱԳՆ պաշտոնական ներկայացուցիչ Էմանուել Նահշոնը հրաժարվել է մեկնաբանել հաղորդագրությունները` հայրենակցի արտահանձման գործընթացը սկսելու մասին։
Հիշեցնենք, որ ՌԴ և Իսրայելի քաղաքացի Ալեքսանդր Լապշինը, որը բնակվում էր Մոսկվայում և վարում է հեղինակավոր Travel Blog-ը, ձերբակալվել էր 2016 թվականի դեկտեմբերի 15-ին Մինսկում:
2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին գրել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Ադրբեջանը դիմել է Բելառուսին՝ Լապշինին արտահանձնելու պահանջով: Բելառուսն էլ բավարարել էր գործընկեր երկրի պահանջն ու Լապշինին արտահանձնել Բաքվին:
