ԵՐԵՎԱՆ, 25 հուլիսի — Sputnik. Արմավիրի մարզպետ Աշոտ Ղահրամանյանի խորհրդական Մանուկ Սիմոնյանն արդեն երկու օր է չի ներկայանում աշխատանքի: Այս լուրը Sputnik Արմենիայի հետ զրույցում հաստատեց Արմավիրի մարզպետարանի աշխատակազմի ղեկավար Փառանձեմ Կարապետյանը:
«Վերջին անգամ ուրբաթ օրն է եկել աշխատանքի: Մանուկը շատ հանգիստ մարդ է, կոնֆիլկիտային չէ, որ մտածենք, թե ինչ-որ կոնֆլիկտի արդյունք կարող է լինի նրա անհետացումը»,- ասաց Փառանձեմ Կարապետյանը:
Արմավիրի մարզում Մանուկ Սիմոնյան անունով քաղաքացու անհետ կորելու մասին հաղորդում ոստիկանությունը ստացել է հուլիսի 23-ին: Այս մասին Sputnik Արմենիային ասաց Ոստիկանության ԶԼՄ-ների հետ կապի բաժնի պետ Էդգար Ջանոյանը: «Այս պահին որոնողական աշխատանքները շարունակվում են, բայց դեռ արդյունք չունենք»,-ասաց Ջանոյանը:
Մանուկ Սիմոնյանը ծնվել է 1965 թվականին Նոր Արմավիր գյուղում: Ամուսնացած է, ունի մեկ զավակ:
