ԵՐԵՎԱՆ, 24 հուլիսի — Sputnik. Սելեկտիվ աբորտները դեռ շարունակում են վտանգ ներկայացնել ազգային անվտանգության համար, անկախ նրանից, որ վերջին տարիներին բնակչության շրջանում մտածելակերպի փոփոխություն է նկատվում, երկուշաբթի լրագրողներին ասաց «Մարդկային զարգացման միջազգային կենտրոն» հասարակական կազմակերպության (ՄԶՄԿ) գործադիր տնօրեն Արմեն Գալստյանը:
Նրա խոսքով` մի քանի տարիների ընթացքում իրավիճակը փոխվել է դեպի լավը, համատեղ ջանքերով հաջողվեց փոխել մարդկանց գիտակցությունն ու հոգեբանությունը։
«Մենք սովորենք ամեն անգամ խոսել վատ վիճակագրության և ցուցանիշների մասին։ Բայց մարդկանց հոգեբանությունը փոխվել է։ Թեև, եթե այժմ դուրս գանք փողոց, քաղաքացիներին հարցնենք, թե ինչ են նրանք մտածում սելեկտիվ աբորտների մասին, շատերը կպատասխանեն. «Հայաստանին զինվորներ են պետք»։ Սակայն զինվորներին մայրեր են պետք, այդ իսկ պատճառով ազգային անվտանգության հարց է առաջանում», – ասաց Գալստյանը։
2015-2017 թվականներն ընկած ժամանակահատվածում մեծածավալ աշխատանք է իրականացվել ԵՄ ֆինանսական աջակցմամբ, «Պայքար սելեկտիվ աբորտների դեմ» նախագծի շրջանակներում։ Գալստյանի կարծիքով` Հայաստանում սելեկտիվ աբորտների հարցը բավականին նուրբ հարց է, և դրա լուծման մեջ մեծ է մամուլի դերը։
«Մարդկային զարգացման միջազգային կենտրոն» հասարակական կազմակերպության զարգացման և ուսումնասիրությունների բաժնի ղեկավար Վահան Ասատրյանը նշեց, որ եթե վերադառնանք և նայենք մեր տատիկների սերնդին, ապա կարելի է տեսնել հետևյալը. գրեթե յուրաքանչյուր ընտանիքում այնքան աղջիկներ էին ունենում, մինչև տղա ծնվի։ Իսկ այսօր 11-12-րդ շաբաթվա վրա իմանում են երեխայի սեռն ու որոշում աբորտ անել։
Բացի այդ, նա ավելացրեց, որ եթե հինգ տարի առաջ Հայաստանում ծնված երեխաների թվի հարաբերակցությունը 100 աղջիկ/115 տղա էր, ապա այսօր այլ իրավիճակ է` հարաբերակցությունը կրճատվել է 100/112 համապատասխանաբար։ Այդ մասին են վկայում 2016 թվականի վերջից 2017 թվականի սկիզբն ընկած ժամանակահատվածում իրականացրած ուսումնասիրության արդյունքները։
«Եթե 2011 թվականին կանայք նշում էին, որ հասարակության 60% գերադասում է տղա ունենալ, ապա 2017 թվականին այդ ցուցանիշը կազմել է 36,7%։ 2011 թվականին այն հարցին, թե արդյոք արական սեռին եք նախապատվություն տալիս, դրական են պատասխանել կանանց 45%–ը, ապա 2017 թվականին` հարցվածների միայն 12,9%–ը», – նշեց Ասատրյանը։
Ուսումնասիրությունն իրականացվել է 19-49 տարեկան կանանց շրջանում։
