ԵՐԵՎԱՆ, 24 հուլիսի — Նելլի Դանիելյան, Sputnik. Հուլիսի 20-ին Ռուսաստանի Դաշնությունից Հայաստան տեղափոխված Հրաչյա Հարությունյանի հարազատներն առայժմ նրան հանդիպելու հնարավորություն չեն ունեցել։
Այս մասին Sputnik Արմենիայի հետ զրույցում ասաց նրա կինը` Անահիտ Հարությունյանը։
«Առաջիկա երկու օրվա ընթացքում, երևի, կգնանք կտեսնենք Հրաչյային։ Մեր հարազատներից, ծանոթներից ոչ ոք դեռ չի հանդիպել»,– ասաց տիկին Անահիտը` հավելելով, որ ամուսնու հարցով հիմնականում զբաղվում է և առավել քաջատեղյակ է իր հայրը` Վիկտոր Մարտիրոսյանը։
Հրաչյա Հարությունյանը Ռուսաստանից Հայաստան է տեղափոխվել առողջական լուրջ խնդիրներով։ Այս մասին մեզ հայտեց Վիկտոր Մարտիրոսյանը։ Նրա խոսքով իր փեսային «Նուբարաշեն » ՔԿՀ–ում զննել են տեղի բժիշկները, ովքեր նշել են, որ վիրահատությունն անխուսափելի է և չի բացառվում, որ այն կատարվի առաջիկա մեկ ամսվա ընթացքում։
«Ողնաշարի վրա ճողվածք կա, որը խանգարում է, որ ողնաշարն աշխատի, չի կարողանում թեքվել, դա կարող է փայտացման հանգեցնել։ Բացի այդ թևի տակ ուռուցք ունի։ Բժիշկները չեն կարողացել հասկանալ` չարորակ է, թե ճարպակույտ է»,– ասաց Վիկտոր Մարտիրոսյանը։
Հրաչյա Հարությունյանը նաև սրտի հետ կապված խնդիր ունի, որը, նրա աներոջ խոսքով, ի հայտ է եկել ավտովթարի հետևանքով ապրած ուժեղ ցնցման արդյունքում։
Վիկտոր Մարտիրոսյանը փեսայի հարցով հանդիպել է նաև պատասխանատու մարմինների աշխատակիցների ու իրավաբանների հետ, ովքեր չեն բացառել, որ Հրաչյա Հարությունյանն իրավական ընթացակարգով երկու ամսվա ընթացքում ազատ կարձակվի։
«Թե՛ հիվանդության առկայությունը, թե՛ այն փաստը, որ Հրաչյան հանցագործ չէ, այլ դժբախտ պատահարի արդյունքում է հայտնվել ազատազրկման մեջ, և թե՛ այն, որ պատժի երկու երրորդ մասն արդեն կրել է, իրավաբանների խոսքով, թույլ են տալիս վաղաժամկետ ազատման գործընթաց սկսել։ Հայաստանում այդ օրենքը տարածվում է 4 տարի պատիժ կրած անձանց վրա։ Հրաչյան 4 տարի 2 ամիս արդեն ազատազրկված է»,– ասաց Վիկտոր Մարտիրոսյանը` հավելելով, որ Հրաչյայի դեպքում պետք է համադրվեն ՌԴ և ՀՀ օրենքների պահանջները։
Այս ընթացակարգով զբաղվելու համար Հարությունյանների ընտանիքն այս պահին փաստաբան չունի, սպասում են ՔԿՀ հրավիրվող հատուկ բժշկական հանձնաժողովի եզրակացությանը։
Իսկ մինչ այդ, Վիկտոր Մարտիրոսյանը մեզ հետ զրույցի պահին նաև ՀՀ նախագահին ուղղված նամակ էր գրում`փեսային ներում շնորհելու խնդրանքով։
Հրաչյա Հարությունյանը գտնվում է «Նուբարաշեն» քրեակատարողական հիմնարկում, որտեղ հարազատների խոսքով, նրա համար ապահովված են բոլոր պայմանները, նրա նկատմամբ վերաբերմունքից հարազատները գոհ են։
Հիշեցնենք, որ 2013 թվականի հուլիսի 13-ին Պոդոլսկի շրջանում ԿԱՄԱԶ մակնիշի մեքենայով տեղի ունեցած ավտովթարի հետևանքով 18 մարդու մահվան պատճառ դարձած Հրաչյա Հարությունյանը մեղավոր է ճանաչվել ՌԴ Օրենսգրքի 264 (ճանապարհային երթևեկության և տրանսպորտային միջոցների շահագործման խախտման) և 327 (կեղծ փաստաթղթերի պատրաստում) հոդվածներով նախատեսված արարք կատարելու մեջ և դատապարտվել 6,9 տարի ազատազրկման:
Հուլիսի 20-ին «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով՝ պատժի մնացած մասը՝ 2 տարի 9 ամիսը Հայաստանում կրելու համար, Հրաչյա Հարությունյանն արտահանձնվել է ՀՀ–ին և տեղափոխվել «Նուբարաշեն» ՔԿՀ:
