Տավուշի մարզի Չինարի գյուղը երկու օր առաջ մի քանի ժամ շարունակ կրակի տակ էր։ Ադրբեջանի զինուժի կրակոցներից Չինարիում վնասվել է մանկապարտեզը, բնակելի տներ, բայց ամենամեծ կորուստ գյուղի բնակիչ Տիգրան Վանյանն է կրել, ասաց Չինարիի գյուղապետ Սամվել Սաղոյանը՝ նշելով, որ նրա 30 տարվա անասնագոմն այրվել է ամբողջությամբ, ոչինչ չի մնացել:
Չինարին 12 մլն դրամի վնաս է կրել: Վերջին կրակոցների օրը հարևան գյուղից կոմբայն էին բերել, որ հացահատիկը քաղեն: Մնացել էր անքաղ միայն 4 հեկտարը: Այդ 4 հեկտարի ցորենը դեռ չեն շտապում հնձել:
«Նախորդ օրերը գյուղում հանգիստ են անցել: Ո՛չ խուճապ կա, ո՛չ անհանգստություն, սովորել ենք: 30 տարի այսպես ապրում ենք, էլի կապրենք: Կարևորը սահմանն ամուր ենք պահում, մեր ցորենն էլ ենք մշակում, մեր խաղողն էլ, միրգ ու բանջարեղենի պակաս չունենք»,- ասաց Սաղոյանը:
Զրույցը վարեց Դիանա Հարությունյանը։ Ամբողջական տարբերակը կարող եք ունկնդրել Sputnik Արմենիա ռադիոկայանի եթերում (FM106)։
