ԵՐԵՎԱՆ, 24 հուլիսի — Sputnik. Թուրքական արխիվներում հայտնաբերված Կոստանդնուպոլսի հայկական պատրիարքության կնիքով փաստաթղթում ասվում է, որ Կոստանդնուպոլսի պատրիարք Զավենը 20-րդ դարի սկզբին հաղորդում է 1916 թվականի մարտի վերջին Իրաքի Մոսուլի տարածքում սպանված ծննդով էրզրումցի Կարապետ Գրիգոր Զարմանյանի մասին։
Նա գաղթել էր ցեղասպանության ժամանակ՝ թուրքական իշխանության հրամանով։ Փաստաթուղթը հրապարակել է CNN turk-ի խմբագիր Սերդար Կորոջուն bianet.org կայքում։
1869 թվականին ծնված բաղդատցի պատրիարք Զավեն Տեր-Եգանյանը հայրենիքից հեռացել էր, երբ երիտթուրքերի կառավարությունը փակել էր պատրիարքարանը։ Վերադառնալ Պոլիս նրան հաջողվել է երեք տարի անց՝ երիտթուրքերի իշխանության անկումից հետո։
Ցեղասպանության տարիներին պատրիարքի համար ամենադժվարը հայկական ընտանիքներին մահվան կամ հարազատների անհետացման մասին լուրն ասելն էր։
Էրզրումցի Զարմանյանի մահվան մասին փաստաթղթում, որը ֆրանսերեն է գրված, նա նշում է, որ զոհվածի կինն ու երկու դուստրերը ողջ են։
Կորոջուն հույս ունի, որ թուրքական արխիվներից փաստաթղթի հրապարակումը կօգնի գտնել Զարմանյանի հետնորդներին։ Սպանվածի էրզրումցի կնոջն անվանում էին Գադարինե Զարմանյան, իսկ դուստրերին՝ Նվարդ և Մարի։
