ԵՐԵՎԱՆ, 23 հուլիսի — Sputnik, Լաուրա Սարգսյան. Ազնվամորով խմորեղեն, ազնվամորուց պատրաստած մուրաբա կամ այլ ուտեստ համտեսեցին Սյունիքի մարզի Աշոտավան գյուղում կազմակերպած Ազնվամորու երկրորդ ամենամյա փառատոնի մասնակիցները։
Ազնվամորուց պատրաստած ուտեստի ավելի քան 20 տաղավար. այս հատապտուղը սիրում են ինչպես փոքրերը, այնպես էլ մեծահասակաները ոչ միայն նրա անկրկնելի համի համար, այլև այն պարզ պատճառով, որ հատապտուղը բուժիչ հատկություններ ունի։
Այն լայնորեն կիրառվում է ժողովրդական բժշկության մեջ։ Սյունիքում այդ բուրավետ հատապտղից շատ կա։
«Փառատոնի նպատակը հատապտուղը ճանաչելի դարձնելն է։ Մենք ազնվամորի արտադրողների խումբ ունենք, որոնք մտադիր ենք ավելի մեծ շուկաներ դուրս գալ»,- Sputnik Արմենիայի թղթակցի հետ զրույցում ասաց Սյունիքում World Vision ծրագրի ղեկավար Լենա Կարապետյանը։
Նրա խոսքով` միայն անցյալ տարի փառատոնին մասնակցել է մոտ 3000 տեղացի և զբոսաշրջիկ։ Այս տարի նրանց թիվն ավելի մեծ էր։
Սյունիքում, նաև Արագածոտնում շատ լավ պայմաններ կան ազնվամորու աճեցման համար, ինչպես բնության տեսանկյունից, այնպես էլ մարդկային ներուժի։
Ազնվամորու աճեցման առաջին ֆերմերական խմբերը ստեղծվել էին դեռևս երկու տարի առաջ՝ Արագածոտնի մարզում։ Նրանք տարեկան շուրջ 130 տոննա ազնվամորի են աճեցնում։
Ազնվամորու առաջին փառատոնն անցկացվեց 2016 թվականին ՀՀ Արագածոտնի մարզում` Արագած լեռան լանջին։
