ԵՐԵՎԱՆ, 22 հուլիսի- Sputnik, Անի Լիպարիտյան. Հայ ծրագրավորողները կրկին զարմացրեցին իրենց կրեատիվությամբ. նրանց հաջողվել է ստեղծել «շատ խելացի» նոթատետր, որն ընդունակ է չվնասել շրջակա միջավայրը։
Technology & Science Dynamics TSD խմբի մասնագետների մոտ ի սկզբանե այլ գաղափար կար՝ ստեղծել խելացի նոթատետր, որից տեղեկությունը կարելի է շատ արագ փոխանցել և պահպանել «ամպի» մեջ,- Sputnik Արմենիայի հետ հարցազրույցում ասաց ընկերության մամլուլի քարտուղար Անահիտ Բաղդասարյանը։
«Սկզբում մենք մտածում էինք ստեղծել նորարարական մի բան, ինչը թույլ կտար նոթատետրը կորցնելու դեպքում պահպանել բոլոր գրառումները սմարթֆոնում։ Ընկերության ծրագրավորողները որոշեցին ռիսկի դիմել և ստեղծեցին այս EcoPad-ը, որը ժամանակի ընթացքում կկատարելագործվի։ Այսօր սմարթ-նոթատետրի սեփականատերը հնարավորություն ունի փոխարինել էջերը նորերով (զսպանակը թույլ է տալիս անել դա), այն դեպքում, երբ նա չի ուզում ջնջել նոթատետրում եղած ողջ տեղեկությունը։
Հրաշք նոթատետրը
Technology&Science Dynamics TSD —ի մասնագետների նախագիծը բաղկացած է երեք տարրերից՝ նոթատետրը, հատուկ գրիչը և բջջային հավելվածը։ Առայժմ հավելվածը գործում է Android օպերացիոն համակարգում, ավելի ուշ նաև կհայտնվի նմանատիպը IOS — ի համար (ներկայումս այս հավելվածը գտնվում է մշակման փուլում)։
«Այս նոթատետրում կարելի է գրառումներ կատարել և դրանք ջնջել գրչի ծայրի հատուկ ռետինով։ Ընդ որում՝ ինչքան որ կցանկանաք։ Մշակման ևս մեկ առանձնահատկություն՝ նոթատետրի յուրաքանչյուր էջում կա հատուկ QR ծածկագիր։ Հավելվածը ճանաչում է այդ ծածկագիրը, և եթե դուք լուսանկարեք այն, նկարը միանգամից կտեսնեք JPEG ձևաչափով»,- ասում է Բաղդասարյանը։
Լուսանկարելուց հետո կարող եք լուսանկարի ֆայլը միանգամից ուղարկել Icloud կամ պահպանել ցանկացած գաջեթում։
«Թարմ թխած» նոթատետր
Ինչպես պարզվեց՝ էկո-նոթատետրը կարելի է տաքացնել։ Ոչ, ամենևին էլ ոչ սննդի մեջ օգտագործելու համար:
Եթե նոթատետրն ամբողջությամբ լեցուն է, այն կարելի է տեղադրել միկրոալիքային վառարանում և վրան դնել բաժակով ջուր։ Հինգ րոպեից դուք կունենաք բոլորովին նոր նոթատետր, բացատրեց Sputnik Արմենիայի զրուցակիցը։
Այդպես կարելի է անել տասն անգամ։ Այս հատկության շնորհիվ կարելի է պահպանել ծառերը հատումներից։ Դա է պատճառը, որ նոթատետրը կոչվում է EcoPad։
EcoPad-ը վաճառքի է հանվել այս տարվա հուլիսի 19-ից։ Երևանում այն կարելի է ձեռք բերել 13000 դրամով (26 դոլար)։ Այս արտադրանքը նախատեսված է ոչ միայն հայկական, ալյև արտասահմանյան շուկայի համար. միջազգային շուկա դուրս գալու հարցերը ներկայումս քննարկվում են։
