Ի՞նչ տպավորություններ է ստացել ամերիկաբնակ մարզիչը Հայաստան կատարած այցից, ի՞նչ փիլիսոփայությամբ է առաջնորդվում աղջիկներին մարզելիս, և ինչո՞ւ է որոշել հայերեն դաջվածք անել թևին։ Sputnik Արմենիայի հետ զրույցում այս հարցերին պատասխանել է ամերիկաբնակ մարզիչ Դևիդ Տիգրանյանը։ Զրուցել է Արփի Բեգլարյանը։
-Առաջին անգամ եք Հայաստանում: Կխոսե՞ք Ձեր տպավորությունների մասին։
— Շատ տպավորված եմ, մարդիկ շատ բարեհամբույր են իմ նկատմամբ, յուրաքանչյուրն ընդունում է ինձ որպես իր ընտանիքի անդամի, ցանկանում է լավ բան անել ինձ համար: Շատ զգացված եմ: Բազմաթիվ ընկերներ ձեռք բերեցի, նոր մարդկանց հետ ծանոթացա: Ես եկել եմ առաջին հերթին օգնելու GOALS-ի (կանանց ֆուտբոլի զարգացմամբ զբաղվող կազմակերպություն Հայաստանում — խմբ.) կամավորներին աշխատել երեխաների ու երիտասարդների հետ և, իհարկե, որ մոտ լինեմ արմատներիս:
-Շատ հետաքրքիր դաջվածք ունեք, որը հայերեն է գրված: Ե՞րբ և ինչո՞ւ որոշեցիք անել այն:
— Մեկ տարի առաջ եմ արել: Շատ հավատացյալ մարդ եմ, հավատում եմ Աստծուն, և եթե շատերը խաչ են կրում, ես որոշեցի դաջվածք անել՝ «Աստված օրհնի»:
- Վաղո՞ւց եք աշխատում կանանց և աղջիկների հետ։
— Ես 10 տարի «Yell» համալսարանի կանանց ֆուտբոլի մարզչական կազմում էի: Մինչ այդ աշխատել եմ երիտասարդական ակումբների, ինչպես նաև բարձրագույն դպրոցների թիմերի հետ: Աշխատել եմ 3-15 տարեկան աղջիկների հետ:
-Հետաքրքիր եք վարում ֆուտբոլային խաղ-դասընթացները: Հայաստանում մարզանքները նման սկզբունքով չեն անցկացվում: Ո՞րն է Ձեր հիմնական սկզբունքը: Ի՞նչ են դրանք տալիս աղջիկներին:
— Ես փորձում եմ ուսումը համատեղել զվարճանքի հետ: Դա է իմ փիլիսոփայությունը, հատկապես, երբ խաղացողները նոր են ֆուտբոլում, ես փորձում եմ համատեղել այդ երկու բաղադրիչները: Մեթոդը սա է` տալ հիմք, այնուհետև աղջիկների գիտելիքներն ամրապնդել տեխնիկական խաղերի միջոցով: «GOALS»-ի հետ կապը ստեղծվել է Հայկական բարեգործական ընդհանուր միության «Քաղաքացիական հասարակության կամուրջ» ծրագրի շնորհիվ, ինչի համար շատ շնորհակալ եմ, քանի որ շատ եմ կարևորում նման միջոցառումների անցկացումը: Սա շատ կարևոր թիմային աշխատանք էր:
-Նախատեսու՞մ եք նորից այցելել Հայաստան:
— Այո, իհարկե: Ուզում եմ ամեն ամառ այցելել Հայաստան և օգնել: Շարունակելու եմ աշխատել ՀԲԸՄ-ի և GOALS-ի հետ, աշխատելու եմ նաև նոր ծրագրեր մշակել աղջիկների համար, որպեսզի նրանք վայելեն ֆուտբոլը:
