Պաշտոնական Թեհրանը կցանկանար ավելի մեծ ներգրավվածություն ունենալ Լեռնային Ղարաբաղի շուրջ բանակցությունների գործընթացում, Sputnik Արմենիա մամուլի կենտրոնում ասաց տարածաշրջանային հարցերի փորձագետ Էհսան Հուշմանդը։
«Մենք հույս ունենք, որ այդ հակամարտությունը լուծվելու է բացառապես խաղաղ ճանապարհով։ Կցանկանայինք, որ Իրանն ավելի շատ ներգրավված լիներ հակամարտության կարգավորման հարցում, որպեսզի ճգնաժամային իրավիճակի պայմաններում կարողանար կանխել ռազմական գործողությունների հավանականությունը», – ասաց Հուշմանդը։
Նրա խոսքով` տարածաշրջանի ժողովուրդներից ոչ մեկը չի ուզում, որ այս հարցը լուծվի ռազմական ճանապարհով։
Փորձագետը համոզված է, որ տարածաշրջանի երկրների առաջնորդներն այս հակամարտության տրամաբանական և խաղաղ լուծում կգտնեն։
«Իրանը ջանքեր է գործադրելու, որպեսզի որոշ երկրներ, որոնք ներկայացված չեն տարածաշրջանում, չխառնվեն կարգավորման գործընթացին», – ասաց Հուշմանդը։
Ավելի վաղ Երևանը հայտարարել էր, որ Ղարաբաղյան հակամարտության կարգավորման գործում անթույլատրելի է Անկարայի մասնակցությունը։ Մասնավորապես ՀՀ ԱԺ նախագահի տեղակալ Էդուարդ Շարմազանովը հայտարարել էր, որ «մի պետություն, որը բացահայտ աջակցել և աջակցում է Ադրբեջանի ահաբեկչական քաղաքականությանը, անելիք չունի Արցախյան հիմնախնդրի կարգավորման հարցում»։
