ԵՐԵՎԱՆ, 21 հուլիսի — Sputnik, Արմենուհի Մխոյան. Լիլիթ Խաչատրյանը հուլիսի 21-ին լույս աշխարհ է բերել իր 11-րդ երեխային: 35 տարեկան կինը ծննդաբերել է «Գյումրու ծննդատուն» ՓԲԸ-ում: Նորածինը՝ Դավիթը, ծնվել է բնական եղանակով և 3 կգ 600 գրամ քաշով: Տանը փոքրիկ Դավիթին արդեն սպասում են 5 քույրերն ու 5 եղբայրները՝ Շուշանը, Սամվելը, Հեղինեն, Հովսեփը, Զավենը, Դանիելը, Հակոբը, Ռոզան, Մարինեն, Օլյան։ Ավագ աղջիկը 17 տարեկան է: Ընտանիքի հայրն արհեստավոր է, բնակարանների վերանորոգմամբ ու կահույքագործությամբ է զբաղվում:
Խաչատրյաններին առաջինը շնորհավորելու համար «Գյումրու ծննդատուն» ՓԲԸ էր եկել Շիրակի մարզպետ և երեք երեխայի հայր Արթուր Խաչատրյանը, որը չթաքցնելով ուրախությունը` շեշտեց` լուրն, իրոք, ամենաուրախալին էր իր պաշտոնավարման ընթացքում:
«Սա ցույց է տալիս, որ երկրի նկատմամբ մարդիկ վստահություն ունեն: Եթե վստահություն չի լինում, փորձում են 1 կամ 2 երեխայով բավարարվել»,- ասաց մարզպետը
Նա նշեց, որ հիվանդանոցից դուրս գրվելուց հետո պատրաստ է ընդունել կնոջը՝ լսելու համար ընտանիքի խնդիրները:
«Սա աշխատանքային շաբաթվա ամենահաճելի ավարտն է: Ժողովրդագրական վիճակը բավական ցածր է, մարդիկ թե՛ ժամանակի թելադրանքով, թե՛ սոցիալական խնդիրներով պայմանավորված ձեռնպահ են մնում շատ երեխաներ ունենալուց, ու նման դեպքերը բացառություն են, բայց Աստված տա` այս դեպքերը դառնան օրինաչափություն»,-լրագրողների հետ ունեցած զրույցի ժամանակ նշեց Խաչատրյանը:
Մայրը զրույցի ժամանակ խնդիրներից չդժգոհեց՝ ասելով ամեն մի երեխա իր «ղսմաթն» ունի:
«Խորհուրդ կտամ բոլոր մայրերին շատ երեխաներ ունենալ: Ճիշտ է` դժվարություններ կան, բայց ամեն դժվարություն պետք է հաղթահարել: Աստված ուժ կտա ու կպահես երեխային»,-նշեց մայրը:
Խաչատրյանների ընտանիքը բնակվում է 4 սենյականոց քարե տնակում, թեև ժամանակին կառավարությունը բնակարան տվել է, բայց 13 անդամ ունեցող ընտանիքն ամբողջ կազմով չի կարող բնակվել 3 սենյականոց բնակարանում:
