ԵՐԵՎԱՆ, 21 հուլիսի — Sputnik. Հանթսմանների ընտանիքը մշտապես բարեկամական հարաբերություններ է ունեցել Հայաստանի հետ, և չի բացառվում, որ նա ծրագրեր իրականացնի Հայաստանում, կարծում է քաղաքագետ Սուրեն Սարգսյանը։
Քաղաքագետն ուշադրություն է հրավիրում այն փաստի վրա, որ Ջոն Հանթսման կրտսերը դեսպանի թեկնածու է առաջադրվել հենց Ռուսաստանում։
«Մեկընդմիշտ պետք է հասկանալ, որ Հանթսմանը Ռուսաստանում ներկայացնելու է ամերիկյան շահերը և փորձելու է մեղմել ԱՄՆ-ի և ՌԴ-ի լարված հարաբերությունները։ Եթե նա կարողանա որոշակի օգնություն ցուցաբերել նաև ՌԴ-ի հայ համայնքին, իհարկե, ողջունելի կլինի»,- ասաց քաղաքագետը։
Ըստ Սարգսյանի` պետք է հասկանալ նաև, որ Հանթսմանը մեծահարուստ ընտանիքի ներկայացուցիչ է և ֆինանսական լուրջ միջոցներ ունի։
«Նա կարող է իր անձնական միջոցները ներդնել ՌԴ-ում և հայկական համայնքի ազդեցության ներքո ինչ-որ ծրագրեր իրականացնել նաև ՀՀ-ում»,- ասաց քաղաքագետը` հիշեցնելով, որ Հանթսման ավագը ժամանակին ակտիվ գործունեություն է ծավալել Հայաստանում, և 1988թ. ավերիչ երկրաշարժից հետո մեր երկրին ցուցաբերած մեծ աջակցության համար նրան ՀՀ քաղաքացիություն է շնորհվել։
Ադրբեջանը ցեյտնոտի մեջ է հայտնվել Սպիտակ տան որոշումից, ադրբեջանական մամուլում ներկայացված է, թե իբր Ջոն Հանթսման կրտսերը եղել է ՀՀ-ում ԱՄՆ նախկին դեսպանը, սակայն դա իրականության հետ որևէ կապ չունի։
Սուրեն Սարգսյանն ընդգծում է, որ 1992 թվականին, երբ ԱՄՆ-ում քննարկվել է ՀՀ-ում դեսպան նշանակելու հարցը, թեկնածուներից մեկը հենց Ջոն Հանթսման ավագն է եղել։ Քաղաքագետը նշում է, որ Հանթսմանը Բարաք Օբամայի վարչակարգի օրոք դեսպան է եղել Չինաստանում, և ընդհանրապես նրանց ընտանիքը միշտ եղել է ամերիկյան քաղաքական վերնախավում ու ծանրակշիռ ազդեցություն է ունեցել։
Նշենք, որ ԱՄՆ-ն Հայաստանում դեսպանություն է հիմնել 1992 թվականին։ Հայաստանի Հանրապետությունում Միացյալ Նահանգների առաջին արտակարգ և լիազոր դեսպանը եղել է Հարի Գիլմորը, որը պաշտոնավարել է 1993թ. մայիսից մինչև 1995թ. հուլիսը։
