ԵՐԵՎԱՆ, 20 հուլիսի — Sputnik, Դիանա Հարությունյան. Բժիշկներն ախտորոշեցին. կյանքի հետ արյան անհամատեղելի չափով կորուստ և կրկնակի սրտի կաթված: Սա իսկական շոկ էր հայ հոգեբանների համար: Այսպիսի դեպք չեն հիշում: Պատմում են, որ դեպքը տեղի է ունեցել հերթական այցելության ժամանակ, «ԱՅԳ» հոգեբանական կենտրոնի այգում: Գիտեն հաստատ, որ դանակահարողն այցելուն է եղել, այդ պարագայում Ռուբեն Պողոսյանն աշխատանքային ժամին, այգում չէր լինի:
Հոգեբանական գիտությունների դոկտոր պրոֆեսոր Սրբուհի Գևորգյանը Ռուբեն Պողոսյանի հետ աշխատել է թե՛ «ԱՅԳ» կենտրոնում, թե՛ մանկավարժական համալսարանում: Նրա գնահատմամբ` խոսքը եզակի տաղանդավոր մասնագետի մասին է, ու կապել տեղի ունեցածը նրա մասնագիտական գործունեության հետ, իհարկե, չարժե: Այլ հարց է, որ իսկապես գնալով ավելի ռիսկային է դառնում հոգեբանների գործունեությունը:
«Դեպքը տեղի է ունեցել այցելուների գրանցված ժամին, իրականում ոչ մեկս երաշխավորված չէ նման իրավիճակից: Նա բացառիկ զգույշ ու պրոֆեսիոնալ հոգեվերլուծաբան էր: Տեղի ունեցածի պատճառն, իհարկե, այս պահին դժվար էլ որևէ մեկը կարողանա ասել: Նա ուսուցիչ էր, մարդ, որ շատերի համար էր հոգեբանության ճանապարհը հարթել և ուղղորդել»,-պատմում է Գևորգյանը:
Հիվանդի՝ բժշկի վրա հարձակվելու նմանատիպ մի դեպք մեզ հետ զրույցում հիշեց «Մադաթյան» հոգեբանական կենտրոնի ղեկավար Միհրդատ Մադաթյանը: Այն կատարվել էր մաշկաբանի աշխատասենյակում: Իրականում, տեղի ունեցածի արմատներն ավելի խորը կարող են լինել: Խնդիրն ընդհանուր է: Հայաստանում, ըստ Միհրդատ Մադաթյանի, այդպես էլ չի զարգանում հոգեբույժի ինստիտուտը:
«Շատերը հոգեբույժին դիմելու փոխարեն, գնում են հոգեբանի մոտ: Հաճախ չեն էլ ասում, թե իրականում ինչ խնդիրներ ունեն իրենց հարազատները: Հոգեբանն առերեսվում է հոգեկան հիվանդություն ունեցողների հետ, իսկ այդ դեպքում, իհարկե, բոլորովին այլ մասնագիտական կարիքներ են, բոլորովին այլ բուժում է անհրաժեշտ։ Ռուբեն Պողոսյանն ուսուցիչ էր շատերիս համար, նա ոլորտի լավագույն մասնագետներից էր, ասում է Մադաթյանը:
Իրականում, այս պահին չի կարելի բացառել կամ հաստատել, որ տեղի ունեցածը կարող է հենց այս շարքից լինել։ Սպասում են իրավապահներին: Հարուցվել է քրեական գործ:
ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում ձեռնարկվում են անհրաժեշտ քննչական գործողություններ՝ հոգեբան, դոկտոր-պրոֆեսոր Ռուբեն Պողոսյանի մահվան հանգամանքները պարզելու ուղղությամբ, տեղեկացնում է ՀՀ քննչական կոմիտեի մամուլի ծառայությունը: Հանձնարարություն է տրվել ոստիկանության համապատասխան ստորաբաժանումներին հայտնաբերել և վարույթն իրականացնող մարմնին ներկայացնել ենթադրյալ հանցագործություն կատարած անձին։
Ձեռնարկվում են անհրաժեշտ քննչական և դատավարական այլ գործողություններ՝ դեպքի հանգամանքների բազմակողմանի, լրիվ և օբյեկտիվ քննությունն ապահովելու ուղղությամբ:
Ռիսկային են բոլոր մասնագիտությունները: Ավելի շատ, ավելի պակաս: Սա միջադեպ էր, որ կարող էր տեղի ունենալ նաև կամայական միջավայրում, վերլուծում են Ռուբեն Պողոսյանի գործընկերները:
Ամենավատն ու սարսափելին այն է, որ չի ավարտվում բժշկելու համար սկսված սեանսը, չի ավարտվում` բժշկվողի ձեռքով ավարտելով բուժողի կյանքը:
Կյանքից հեռացել է Հայաստանի լավագույն հոգեբաններից մեկը:
