ԵՐԵՎԱՆ, 19 հուլիսի – Sputnik. Հենրիխ Մխիթարյանին հարյուրավոր հարցեր են ուղղել աշխարհի տարբեր անկյուններից, որոնցից ամենահետաքրքիրներին նա պատասխանել է ուղիղ եթերում։ Armsport.am-ը ներկայացնում է այդ հարցերն ու պատասխանները։
- Կա՞ ինչ-որ բան, որևէ սնահավատություն, որ անպայման անում ես խաղերից առաջ:
— Չկա որևէ բան, որ անում եմ: Պարզապես փորձում եմ կենտրոնանալ ինձ և առաջիկա խաղի վրա:
- Եթե չլինեիր ֆուտբոլիստ, ի՞նչ մասնագիտություն կընտրեիր:
— Գուցե իրավաբան կլինեի: Չգիտեմ` ինչու: Երբ տեսնում եմ նրանց կոստյումներով, մտածում եմ` երևի ինձ էլ կսազեր:
- Ո՞ր ֆուտբոլիստին ես միշտ ցանկացել նմանվել:
— Իմ կուռքը միշտ եղել է Զինեդին Զիդանը: Միշտ հետևել եմ նրան, շատ բաներ եմ սովորել: Նա լավագույն ֆուտբոլիստներից մեկն է եղել: Անձամբ չեմ ճանաչում նրան, շփում չունեմ, բայց շուտով կմրցենք «Ռեալի» հետ Սան Խոսեում, իսկ արդեն օգոստոսի 18-ին Մակեդոնիայում կհանդիպենք նրանց ՈւԵՖԱ-ի Սուպերգավաթի խաղում:
- Ի՞նչ զգացողություններ ունես եվրոպական մրցաշարերում Հայաստանը ներկայացնելիս:
— Ես միշտ երազել եմ խաղալ աշխարհի մեծագույն ակումբներից մեկում, ինչը հիմա անում եմ և շատ հպարտ եմ: Երբեք չէի մտածի, որ կհասնեմ այս մակարդակին, բայց դրա համար մշտապես քրտնաջան աշխատել եմ: Շատ ուրախ եմ, որ կարողանում եմ ներկայացնել Հայաստանն այս մակարդակում, քանի որ դա շատ կարևոր է իմ երկրի համար: Փորձում եմ բարձր պահել իմ երկրի անունը: Փորձում եմ անել ինձնից կախված ամեն ինչ:
- Ո՞րն է քո իմացած ամենաբարդ լեզուն և առհասարակ ո՞ր լեզուներին ես տիրապետում:
— Գիտեմ հայերեն, ռուսերեն, անգլերեն, ֆրանսերեն, նաև` մի փոքր պորտուգալերեն և գերմաներեն: Ո՞րն է ամենաբարդը. եթե մի կողմ թողնենք հայերենը, ապա կարծում եմ` գերմաներենն է ամենաբարդը:
- Ինչպե՞ս ես սովորել այդ բոլոր լեզուները:
— Դե, հայերենն իմ մայրենի լեզուն է: Ռուսերեն սովորել եմ դպրոցում, նաև մորական տատիկիցս, որը ռուս էր: Ֆրանսերեն սովորել եմ Ֆրանսիայում ապրելու տարիներին: Անգելերեն սովորել եմ դպրոցում ու մարդկանց հետ շատ շփվելով: Գերմաներեն սովորել եմ ինքնուրույն, երբ խաղում էի Գերմանիայում: Իսկ պորտուգալերեն սովորել եմ Բրազիլիայում` 4-ամսյա պրակտիկայիս ընթացքում, որտեղ նաև դպրոց եմ հաճախել:
- Ո՞վ է քո լավագույն ընկերը «Մանչեսթեր Յունայթեդում», և ինչո՞վ եք զբաղվում ազատ ժամանակ:
— Չեմ կարող առանձնացնել կոնկրետ մեկին: Բոլորի հետ շատ ջերմ հարաբերություններ ունեմ: Փորձում ենք միշտ միասին լինել: Թիմն ընտանիքի պես է, ու դու չես կարող ընտանիքից որևէ մեկին առանձնացնել: Ոչ միայն թիմակիցների, այլև ամբողջ անձնակազմի հետ շատ լավ հարաբերությունների մեջ ենք:
- Կարո՞ղ ենք քեզանից ևս մեկ «կարիճ հարված» ակնկալել հաջորդ մրցաշրջանում:
— Ես այս մրցաշրջանում էլ չէի ակնկալում նման հարված (ծիծաղում է): Այդպիսի հարվածներն ինքնըստինքյան են լինում, չես կարող դրանք պլանավորել: Պետք է պարզապես զգաս պահն ու հարվածես: Չէի կարող պատկերացնել, որ այդպիսի գոլ կխփեմ: Ինքս ինձ ասացի, որ պետք է կրունկով հարվածեմ, ուրիշ ոչինչ չէի կարող անել: Փորձեցի և ստացվեց:
