«Կարծում եմ` տարբերակում չպիտի լինի` թեկնածուն պարտվել է, թե հաղթել, քանի որ հաղթել ենք բոլորս, որովհետև մեզ հաջողվել է անցկացնել կարևոր քաղաքական մի գործընթաց, որի արդյունքում ԼՂ խորհրդարանն ընտրեց Արցախի նախագահին։ Նա 2017թ-ի սեպտեմբերին կանցնի իր լիազորությունների կատարմանը»,- ասաց Արցախի խորհրդարանի նախագահը։
Նշենք, որ այսօր` հուլիսի 19-ին, Արցախի խորհրդարանը երկրի ղեկավարի ընտրություն իրականացրեց։ Արցախի նախագահի ընտրությունը կայացավ փակ գաղտնի քվեարկությամբ։ Նիստին 33 պատգամավորներից ներկա էին 32-ը, որոնցից 28-ը քվեարկեցին գործող նախագահ Բակո Սահակյանի, 4-ը` «Շարժում 88» խմբակցության ղեկավար Էդուարդ Աղաբեկյանի օգտին։ Նոր նախագահը կպաշտոնավարի մինչև 2020 թվականը։
2017 թվականի սահմանադրության համաձայն` Արցախն անցում է կատարել կառավարման նախագահական ձևի, և այսուհետև երկիրը կղեկավարի նախագահը, որին 5 տարի ժամկետով կընտրի ժողովուրդը։ Նույն մարդը կարող է պաշտոնավորել ոչ ավելի, քան երկու անգամ անընդմեջ։
