ԵՐԵՎԱՆ, 17 հուլիսի — Sputnik. ՀՀ նախագահ Սերժ Սարգսյանը լրագրողի հարցին պատասխանելիս նախ նշեց, որ ինքը երբևէ չի լսել ռուսական կողմի պատասխանը, թե ինչու է զենք մատակարարում Ադրբեջանին: Ըստ երկրի ղեկավարի՝ եթե մի ռուս քաղաքական գործիչ կամ պաշտոնյա տեսակետ է հայտնում, դա ռուսական կողմի պատասխան չի նշանակում: Այդպես կընկալվի, եթե որևէ հայտարարություն հնչի ՌԴ նախագահի կամ արտգործնախարարի շուրթերից:
«Հայ-ռուսական բարեկամության, ռազմական գործակցության ամենացավալի կողմն է այդ հարցը: Բայց մյուս կողմից կան հանգամանքներ, գուցե այդ հանգամանքները մեզ համար ընդունելի չեն, բայց իրենց համար ընդունելի են: Դեռևս որևէ լուրջ բան չի պատահել: Եթե ինչ-որ մի ժամանակ լուրջ հետևանքներ լինեն, այդ ժամանակ կարելի է վերանայել, իսկ եթե լուրջ հետևանքներ չլինեն, մենք դա պետք է համարենք որպես ռուսական կողմի երկարաժամկետ քաղաքական գործունեություն՝ տարածաշրջանի հետ կապված»,-ասաց Սերժ Սարգսյանը:
Իսկ Ռուսաստանի հետ ռազմավարական գործընկերությունը վերանայելու վերաբերյալ որոշ քաղաքագետների կարծիքները նախագահը համարում է ծայրահեղ վտանգավոր:
«Երբ ասում եք՝ վերանայենք, իսկ ու՞մ հետ եք ուզում, որ վերանայենք, բարելավենք՝ Թուրքիայի՞, թե՞ ՆԱՏՕ-ում բոլորը գրկաբաց սպասում են, որ Հայաստանը գա այնտեղ»,-ասաց ՀՀ նախագահը:
Նախագահի խոսքով՝ Հայաստանը չի կարող բոլորի հետ թշնամանալ՝ ասելով՝ դուք Ադրբեջանին օգնում եք, Հայաստանը չի կարող մենակ դուրս գալ աշխարհի դեմ:
Իր խոսքի վերջում նա նշեց, որ մենք միայն սևեռված չենք ՀԱՊԿ-ի, Ռուսաստանի վրա, մենք ունենք հարաբերություն նաև ՆԱՏՕ-ի, Եվրամիության հետ:
