ԵՐԵՎԱՆ, 17 հուլիսի — Sputnik. Նախագահ Սերժ Սարգսյանը հայտնեց, որ չի կիսում այն տեսակետը, թե Մինսկի խումբը կամ միջազգային այլ կառույցներ հավասարության նշան են դնում Հայաստանի ու Ադրբեջանի գործողությունների միջև: Սարգսյանը վստահեցրեց, որ առնվազն երեք անգամ հստակ ի ցույց է դրվել, թե որ կողմն է խախտում հրադադարի ռեժիմը:
«Ուրիշ ինչպե՞ս պետք է վարվի Մինսկի խումբը կամ միջազգային հանրությունը: Բոլորը դրանում համոզված են, որ խախտող կողմն Ադրբեջանն է: Ամեն անգամ մատնացույց անելով Ադրբեջանին՝ կնշանակի խրախուսել հայկական կողմին, շատ ավելի կոշտ պատասխան տալ կամ շատ ավելի լուրջ միջոցներ ձեռնարկել: Ես մի անգամ կիսապաշտոնական միջավայրում երկար զրույց եմ ունեցել համանախագահ երկրներից մեկի ներկայացուցչի հետ և ասել եմ՝ ինչու՞ դուք կոնկրետ մատնացույց չեք անում: Ասաց՝ կոնկրետ մատնացույց անելու պարագայում կարող է դառնանք կողմ, բոլորը կարող են մտածել, թե մենք հայամետ քաղաքականություն ենք վարում, իսկ մեր խնդիրն է բանակցային պրոցեսը շարունակել»,-մեջբերեց նախագահ Սարգսյանը:
ՀՀ գերագույն գլխավոր հրամանատարը նշեց, որ Մինսկի խումբը ոչ թե անզոր է, այլ ամենազոր չէ:
«Անշուշտ, եթե համանախագահող երկրներից յուրաքանչյուրն առանձին-առանձին ցանկանա ինչ-որ բան պարտադրել Ադրբեջանին, իհարկե, կարող է, եթե դա թիվ մեկ խնդիրն է իր երկրի համար: Ամեն դեպքում պատկերացնու՞մ եք, որ ԱՄՆ-ն, Ռուսաստանը և Ֆրանսիան փորձեն ինչ-որ երկրի պարտադրել սեփական կամքը: Մի այլ հանգամանք էլ կա՝ պարտադրանքը միշտ չէ, որ արդյունավետ է»,-ասաց Սերժ Սարգսյանը:
ՀՀ նախագահը մատնացույց արեց այլ հակամարտությունները, աշխարհում կատարվող ահաբեկչական գործողությունները, որոնց դեմ կարծես թե պայքարում են խոշոր խաղացողները: Բայց միշտ չէ, որ նրանք հասնում են հաջողության:
«Այնպես որ այստեղ ևս հասկանալի է Մինսկի խմբի որոշումը, նրանք փորձում են անել համոզելով և ոչ թե կոշտ պարտադրանքով»,-ասաց երկրին ղեկավարը:
Նա մատնանշեց նաև խնդրի երրորդ կետը՝ հետաքննական մեխանիզմներ:
«Խոսքը ոչ միայն որոշելու մասին է, թե որ կողմն է խախտել, այլ նաև հետաքննություն անցկացնել, թե կողմերից որ մեկի որ զինվորն ու որ սպան խախտեցին հրադադարի ռեժիմը: Այստեղ Մինսկի խմբի համանախագահները գնան ու կոնկրետ ստորաբաժաբումներում հետաքննություն անցկացնեն, դա էլ այնքան տրամաբանական չէ»,-ասաց Սարգսյանը:
Նախագահը նշեց՝ մեր պահանջն է, որ ստեղծվի հրադադրի ռեժիմի խախտման հետաքննության մեխանիզմներ:
