ԵՐԵՎԱՆ, 17 հուլիսի — Sputnik. Մենք և շատ-շատ հզոր երկրներ ունակ չենք միջազգային տնտեսական իրավիճակների մասին ունենալ ստույգ տեղեկություններ, դրա համար ասում ենք՝ կանխատեսումներ: «Ռ-էվոլյուցիա» հաղորդմանը տված հարցազրույցում ասաց ՀՀ նախագահ Սերժ Սարգսյանը: Նա շեշտեց, որ տնտեսության մեջ դրական տեղաշարժեր է տեսնում:
«Ես տեսնում եմ ներդրումների ավելացման հնարավորություններ, էական չափով ավելացման: Ինձ համար մեծ նշանակություն ունի պրոցեսը, իսկ պրոցեսները դրական են ընթանում»,-ասաց Սարգսյանը:
ՀՀ նախագահը պատասխանեց այն քննադատություններին, թե ինքը չի կատարել նվազագույն աշխատավարձի մակարդակի, տնտեսական աճի ցուցանիշների մասին խոստումները:
«Այո, նվազագույն աշխատավարձի մասով չի կատարվել մինչև վերջ, տնտեսական աճի մասով՝ մինչև վերջ: Այն ժամանակ կառավարությունը խոստացել էր և իմ հավանությանն էր արժանացել այն, որ նվազագույն աշխատավարձը պետք է կրկնապատկվի: Այն ժամանակ նվազագույն աշխատավարձը եղել է 32.5 հազար դրամ: Արդեն անցյալ տարի մեր նվազագույն աշխատավարձը 55 հազար էր: Այսինքն՝ չի կրկնապատվել, 1.7 անգամ է աճել: 0.3 անգամ չենք կատարել մեր ասածը»,-նշեց նախագահը:
Հետո նա տեղեկացրեց՝ խոստացել էին 5-7 տոկոս տնտեսական աճ, բայց եղել է 3 տոկոսի աճ: Նրա խոսքով՝ դրա համար են նաև կառավարություններ փոխվել: Նախագահը կարևորեց բարձր նշաձող դնելն ու դրան հասնելը, քան փոքր թվեր հնչեցնելն ու հետո բարձրագոչ հայտարարելը, որ ասվածն արեցին:
Նախագահը համոզմունք հայտնեց, որ միշտ պետք է ավելիին ձգտել:
