ԵՐԵՎԱՆ, 17 հուլիսի — Sputnik, Լաուրա Սարգսյան. Վրացի գործարար Թեմուր Չկոնիան շուրջ երկու տարի է` փորձում է Հայաստանում McDonald's բացել։ Գործարարը համապատասխան թույլտվություն ստացել է, բայց արագ սննդի կետ բացելու համար վայր ընտրելու խնդիրը չի լուծվում։
«Վրաստանում McDonald's–ի 12–րդ կետը բացել ենք Քութաիսում։ Ճարտարապետները, քաղաքապետարանի ներկայացուցիչները, հայ հասարակությունն ավելի լավ պետք է տեղեկացված լինեն մեր ռեստորանների որակի մասին։ Այդ նպատակով ես ուզում եմ Երևանի քաղաքապետին հրավիրել և ցույց տալ մեր երկրում գործող McDonald's–ները, ծանոթացնել բարձրակարգ աշխատանքին», – Sputnik Արմենիայի թղթակցի հետ զրույցում ասաց Չկոնիան։
Նա ուզում է երկհարկանի ռեստորան բացել Երևանի կենտրոնում։ Երկրի բնակչության մեծ մասն ընդվզում է այս նախաձեռնության դեմ։ Նրանց կարծիքով` քաղաքի գլխավոր հրապարակում McDonald's բացելը կփչացնի քաղաքի տեսքը։
Սակայն գործարարը չի հուսահատվում և հայկական մամուլի ու սոցցանցի օգտատերերի բազմաթիվ հարցադրումներին ու բողոքներին պատասխանում է, որ Հայաստանում նախագիծը ավարտին հասցնելու մտադրությունն անխախտ է։ Այստեղ բիզնես սկսելու հարցերը Չկոնիան ամբողջությամբ իր վրա է վերցնում` նշելով, որ Հայաստանում McDonald's բացելը նաև մի քանի տասնյակ մարդու աշխատանք ունենալու հնարավորություն կընձեռի։
«Հայաստանի, ինչպես նաև աշխարհի մյուս երկրների առաջ ծառացած է քաղաքացիների զբաղվածության հարցը։ Ես նոր աշխատատեղեր ստեղծելու հիանալի հնարավորություն եմ առաջարկում։ Այսօր Վրաստանում McDonald's–ի համակարգում ավելի քան 1000 մարդ է աշխատում։ Ուրիշ ի՞նչ է պետք Հայաստանին», – ասաց Չկոնիան։
Նրա խոսքով` McDonald's–ը համաշխարհային ապրանքանիշ է, որը կարող է միայն ավելի գրավիչ դարձնել երկիրը։
Հայաստանում McDonald's–ի առաջին ռեստորանը բացելու համար վրացի գործարար Թեմուր Չկոնիան շարունակում է բանակցել Հայաստանի ղեկավարության հետ։
Նախնական ծրագրի համաձայն՝ պետք է կառուցվեր երկհարկանի ռեստորան և տեղակայված լիներ քաղաքի կենտրոնական հատվածներից մեկում, ինչը հայաստանյան McDonald's–ին ամենամյա միջազգային մրցույթի մասնակցելու հնարավորություն կընձեռեր։
Չկոնիան նախատեսում է Հայաստանում, ընդհանուր առմամբ, յոթ նման սննդի կետ բացել։ Ներկա պահին նախագիծը իրականացման փուլում է։ Ռեստորանը կառուցելու համար 1500 քմ մակերես ունեցող տարածք է հարկավոր։
Հայաստանում ռեստորանը բացելու հարցը որոշվում է Օռլանդոյում (ԱՄՆ, Ֆլորիդայի նահանգ) McDonald's ընկերության ներկայացուցչի հետ հանդիպման շրջանակում։ Թբիլիսիում հայտնի ցանցի առաջին ռեստորանը Թեմուր Չկոնիան բացել է 90-ականներին։ Այժմ Վրաստանում աշխատում է McDonald's արագ սննդի 12 կետ։ Բացի այդ, գործարարը նաև Վրաստանում Coca-Cola-ի գործարանի և մի շարք այլ ձեռնարկությունների սեփականատեր է։
