ԵՐԵՎԱՆ, 16 հուլիսի — Sputnik. «Զվարթնոց» պատմամշակութային արգելոց-թանգարանը հուլիսի 15-ի երեկոյան մարդաշատ էր: Գիշերային լուսավորությամբ 7-րդ դարի ճարտարապետության գոհարով հիանալուց բացի, այցելուներին հնարավորություն էր ընձեռվել նաև տաճարից փոքր-ինչ հեռու տեղադրված մեծ էկրանին դիտել հայկական կինոարտադրության վերջին տարիների լավագույն ֆիլմերից մեկը՝ «Կյանք ու կռիվը»:
Ֆիլմը դիտողների շարքերը համալրվեցին նաև ընթացքում: ՀՀ մշակույթի նախարար Արմեն Ամիրյանի ու «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արա Թարվերդյանի յուրօրինակ նախաձեռնությունը հետաքրքրեց նաև օտարերկրացի զբոսաշրջիկներին, և նրանք ևս միացան կինոդիտմանը: Այցելուները խոստովանեցին՝ հետաքրքիր ու նաև խորհրդանշական է, որ նման միջոցառում է անցկացվում «Զվարթնոցի» տարածքում:
Ի դեպ, նախաձեռնությունը շարունակական բնույթ է կրելու՝ հնարավորություն ընձեռելով մեր հայրենակիցներին մշակութային արժեքներին հաղորդակից լինելուց բացի, նաև դիտել հայկական ու արտասահմանյան ֆիլմարտադրության լավագույն ֆիլմերը:
Հաջորդ կինոդիտումը նախատեսված է հուլիսի 22-ին:
