ԵՐԵՎԱՆ, 16 հուլիսի — Sputnik. Հայկական PR մրցանակաբաշխությունն արդեն երկրորդ տարին անընդմեջ ընտրում է հանրային կապերի ու մեդիա դաշտի առավել աչքի ընկած նախագծերն ու անհատներին:
«Մրցանակաբաշխության նպատակն է համակարգել Հայաստանում PR ոլորտում իրականացվող և իրականացված լավագույն ծրագրերը, ինչպես նաև ըստ արժանվույն գնահատել հանրային կապերի մասնագետներին՝ նպաստելով Հայաստանում PR մշակույթի ձևավորմանն ու զարգացմանը: Հայկական PR մրցանակաբաշխությունը կօգնի նոր չափանիշ սահմանել հանրային կապերի պատասխանատուների համար, խթանել առողջ մրցակցությանը մասնագիտական դաշտում, լինել առավել ստեղծագործ, ինքնատիպ ու առաջադեմ»,- ասում է Հայկական PR գիտատեղեկատվական ասոցիացիայի նախագահ Աստղիկ Ավետիսյանը:
Մրցանակաբաշխությունը թեև ընդամենը երկու տարեկան է, սակայն հասցրել է ձեռք բերել մեծ հեղինակություն և վստահություն շնորհիվ մասնագիտական հանձնաժողովի՝ ոլորտի բացառիկ մասնագետների սկզբունքայնության ու անկաշառության:
Աստղիկ Ավետիսյանի՝ խոսքով մոնիտորինգն անցկացվում է մայիսից մայիս: Այդ մեկ տարվա ընթացքում մշտադիտարկման են ենթարկվում բոլոր կայքերի բացառապես բոլոր նյութերը, մեդիանախագծերը, գերատեսչությունների հրապարակային վարքագիծը, ինչպես նաև հանրային կապերի հասանելիությունն ու նախաձեռնողականությունը: Որևէ աշխատված նախագիծ աննկատ մնալ չի կարող, քանի որ գնահատողները հենց դաշտի լավագույն մասնագետներն են, մամուլի խոսնակներն ու լրագրողները:
Մրցանակակիրը հայտնի է դառնում միայն մրցանակաբաշխության օրը: Նույնիսկ մասնագիտական հանձնաժողովի անդամները չեն կարող գուշակել, թե յուրաքանչյուր անվանակարգում առավելագույն ձայներ ստացած և առաջին եռյակում հայտնվածներից որ մեկին նախապատվություն կտրվի: Քվեարկությունը գաղտնի է անցկացվում:
«Չեմ թաքցնի՝ մրցանակաբաշխությունից առաջ զանգեր են լինում, հետո էլ՝ նեղացողներ: Սա անաչառ մշտադիտարկում է, որը նաև մեր հանրության համար է: Օբյեկտիվությամբ միայն կարող ենք խթանել մրցակցությունը, գնահատել ու արժևորել այն, ինչ ունենք, միաժամանակ հասկանանք, թե ինչ տեղեկատվության է սպասում հանրությունը: Հանրային կապերի ամենամյա հետազոտությունը իրականում օգնում է նոր գաղափարների ի հայտ գալուն, հնարավորություն է տալիս վերլուծելու Հայաստանում անկախացումից հետո մասնագիտական ձեռքբերումները, պարզելու ոլորտում առկա խնդիրներն ու բացթողումները՝ նպաստելով հանրային կապերի մասնագետի կրթմանն ու արժևորմանը»,- ասում է Հայկական PR գիտատեղեկատվական ասոցիացիայի նախագահը:
Հայկական PR մրցանակաբաշխության հերթական արարողությունը տեղի կունենա հուլիսի 18-ին:
