Լաուրա Սարգսյան, Sputnik
Երուսաղեմի հայկական թաղամասը փոքր Հայաստան է, որն անդադար հսկում են մեր հայրենակիցները։ Ըստ որոշ տվյալների՝ հայերը Երուսաղեմում ապրում են III դարից։
«Համաձայն հայկական աղբյուրների՝ հայկական թագավորական տոհմի ներկայացուցիչները Երուսաղեմ են եկել IV դարում։ Նրանք այստեղ տներ են կառուցել, որոնց նմանությամբ էլ հետագայում կառուցվել է ամբողջ հայկական թաղամասը»,- Sputnik Արմենիայի թղթակցի հետ զրույցում ասաց Երուսաղեմի Երուսաղեմի Սուրբ Հրեշտակապետաց վանքի առաջնորդ վարդապետ Ղևոնդ Հովհաննիսյանը։
Ձիթենու պտղի հետևից
Սուրբ Հրեշտակապետաց վանքը գտնվում է հայկական թաղամասի սրտում։ Կիլիկիայի թագավորն այն կառուցել է XI-XII դարերում Պարթևների թագուհի Աննա Քահանայապետի տան տեղում։
Վանքի բակում ձգվում է մի հնագույն ձիթենի: Ըստ լեգենդի՝ հենց այս ծառին են կապել Հիսուսին։ Ասում են՝ ծառը հրաշքներ է գործում։ Հին վանական գրքերում նկարագրված են, թե ինչպես է այն անպտղություն ու այլ հիվանդություններ բուժել։
«Անպտղության բուժման դեպքերը շատ են։ Ոմանք գալիս են Երուսաղեմ միայն հանուն այս ծառի պտուղների։ Վերջերս մի կին, որին 25 տարի անարդյունք բուժել էին անպտղության դեմ, մայրացավ ու առողջ զավակ ծնեց»,- ասաց վարդապետը։
Ուղտագնացների համար վանքում առանձնացրել են յոթ սենյակ, որոնք պահպանել են առաջնային տեսքը, թեև մի քանի տարի առաջ վերանորոգվել են։ Սենյակներից մեկում գտնվում է Սուրբ Գրիգոր Տաթևացու մատուռը։ Վանքի ձախ կողմում կա մկրտության ավազան՝ շրջապատված հայկական խաչերով։ Այն հայտնաբերվել է մի քանի տարի առաջ վերականգնողական աշխատանքների ժամանակ։
Սուրբ Հակոբյանց վանքի կանթեղները
Երուսաղեմի ամենագեղեցիկ տաճարներից մեկը Սուրբ Հակոբյանց վանքն է, որը կառուցվել է XI դարում Հակոբ առաքյալի թաղման վայրում։ Հենց այս տաճարում է իր դստերը մկրտել ամերիկյան հաղորդավարուհի, ֆոտոմոդել և դերասանուհի Քիմ Քարդաշյանը։
Առաստաղից կախված մոտ երկու հարյուր կանթեղներն անկրկնելի, խորհրդավոր մթնոլորտ են ստեղծում։ Հնում ամեն մի կանթեղի վերևում զատկի ձու էին կախում։ Հիմա դրանց փոխարինում են հրեշտակապետներով և ծաղիկներով նկարազարդված կավե ձվերը։
Վարկածներից մեկի համաձայն՝ ձվերը կախել են կանթեղների վերևում, որպեսզի փակեն մկների ճանապարհը, որոնք ճարպկորեն վազում էին շղթաներով և խմում կանթեղների յուղը։
Տաճար այցելելը պարտադիր ներառված է զբոսաշրջիկների և ուխտագնացների ծրագրում։
2010 թվականին, հայկական թաղամասում անցկացվող պեղումների ժամանակ գտնվել է Թադեոս առաքյալի կնոջ՝ Հեղինեի տունը։ Ավանդության համաձայն՝ Հեղինեն Կույս Մարիամի ընկերուհին է եղել։ Հեղինեի քարադագաղն այժմ Լուվրում է գտնվում։
