ԵՐԵՎԱՆ, 14 հուլիսի – Sputnik. Հայաստանում, աշխարհագրական և կլիմայական առանձնահատկությունների պատճառով, օդի տաքացման հետ միաժամանակ ակտիվանում են օձերն ու միջատները։ Ընդ որում` դրանց կարելի է հանդիպել ինչպես գյուղական վայրերում, այնպես էլ Երևանի կենտրոնում։
«Օձերն ու կարիճները շատ են լինում շինարարական հրապարակներում։ Նրանք դուրս են գալիս իրենց բնակության վայրերից և նոր բնակավայր փնտրում», – Sputnik Արմենիայի հետ զրույցում ասաց հակահամաճարակային արշավախմբի տնօրեն Աշոտ Սահակյանը։
Այս տարի օձերի ակտիվացումը Երևանում սկսվեց ավելի ուշ, քան 2016 թվականին։ Որոշ փորձագետներ դա կապում են երկար ձմռան հետ։ Օձերն ավելի երկար են ձմեռել, քանի որ ցուրտը ձգձգվել է։ Նրանց ակտիվացումը կապված է զուգավորման շրջանի հետ։
Օձի կծելուց խուսափելու համար անհրաժեշտ է միայն լինել զգուշավոր և չվնասել նրանց։ Առողջապահության նախարարության տվյալների համաձայն` 2017 թվականի առաջին կիսամյակի ընթացքում գրանցվել է օձի խայթոցի 65 դեպք։ Օձերի ակտիվացման հետ կապված բուժհաստատություններին հակաթույն է մատակարարվել, իսկ օձի խայթոցի դեպքում բնակչության բոլոր խմբերի համար բուժումն անվճար է։
Սակայն օձերը, կարիճները և միջատները կարող են հայտնվել ոչ միայն բնակելի տներում կամ փողոցների մայթերում, այլև սննդի պահեստներում, որտեղից սնունդը գնում է խանութներ։ Եթե վաճառքի կետերի սեփականատերերը ժամանակին չնկատեն «անկոչ հյուրերին», դա կարող է հանգեցնել սանիտարահիգիենիկ նորմերի խախտմանը։
Հայաստանում միջատների ոչնչացմամբ զբաղվում է հակահամաճարակային արշավախումբը։ Մի պահոցը մաքրման համար պահանջվում է միջինը չորս ժամ։
Սպառողների միության նախագահ Արմեն Պողոսյանը հայտնեց, որ, ընդհանուր առմամբ, ամառվա մեջ սուպերմարկետներում, շուկաներում ուժեղացվել է սանիտարահիգիենիկ հսկողությունը։ Սակայն փորձագետն ամեն դեպքում կոչ է անում մարդկանց ավելի ուշադիր լինել այս հարցում։
«Ամեն գնորդ կարող է պահանջել բժիշկի կողմից տրված հավաստագիր, որը հաստատում է մսի կամ այս սննդի որակը։ Եթե այդ հաստատագիրը գոյություն չունի կամ այն ժամկետանց է, քաղաքացին կարող է դիմել հատուկ ծառայությանը, որը սննդի որակի հսկողություն է իրականացնում», – լրագրողների հետ զրույցում ասաց Պողոսյանը։
Նույնիսկ, եթե հավաստագիրը ներկայացվել է, իսկ տանը գնորդը հայտնաբերել է, որ ապրանքն անորակ է, գնորդը կարող է ապրանքը հետ վերադարձնել` ներկայացնելով կտրոնը։
