ԵՐԵՎԱՆ, 14 հուլիսի — Sputnik. Հայաստանի կրթական համակարգն այսօր արդեն պետք է պատրաստի նոր սերնդին ապագայի մասնագետ դառնալու համար, ասաց ՀՀ վարչապետ Կարեն Կարապետյանը` ելույթ ունենալով «Մեր դերը չորրորդ արդյունաբերական հեղափոխության մեջ» ազգային մրցունակության վեցերորդ զեկույցի ներկայացման ժամանակ։
«Ի–Վի Քոնսալթինգ» ընկերությունը հրապարակել է Հայաստանի ազգային մրցունակության վեցերորդ զեկույցը` «Մեր դերը չորրորդ արդյունաբերական հեղափոխության մեջ» խորագրով։
Վարչապետի խոսքով` Հայաստանը բաց է աշխարհում տեղի ունեցող տեխնոլոգիական փոփոխությունների համար։
«Մեզ համար շատ կարևոր է հասկանալ և ձեւակերպել այն, թե ինչպիսին է մեր մասնակցությունն այս գործընթացներին, ինչպիսի ազդեցություն կունենա չորրորդ արդյունաբերական հեղափոխությունը մեր կյանքի վրա և մենք այսօր ինչ պետք է անենք նշված մարտահրավերներին վաղը դիմակայելու և, առավել ևս, դրա դրական արդյունքներից եւ հնարավորություններից առավելագույնս օգտվելու համար»,- ասաց Կարապետյանը:
Նա նշեց, որ զարգացման հետևանքով ավտոմատացումն էապես ազդելու է գործող աշխատաշուկայի վրա, և տեխնոլոգիաները փոխարինելու են շատերին իրենց աշխատատեղերում:
Վարչապետն ընդգծեց, որ դա անդրադառնալու է ոչ միայն դասական ոլորտներին, ինչպիսիք են, օրինակ, արտադրությունը, որտեղ ռոբոտաշինությունը կբերի ավելի օպտիմալ լուծումներ, այլեւ մյուս ոլորտների վրա, ինչպիսին է խորհրդատվական ոլորտը, որտեղ արհեստական բանականությունը մարդկանց փոխարեն կատարելու է բազմաթիվ գործառույթներ:
«Մենք ունենալու ենք նոր հմտություններ և գիտելիքներ ձեռք բերելու կարիք: Այդ իսկ պատճառով շատ կարեւոր է ճիշտ կանխատեսել ապագայի մասնագիտությունների այն ամբողջությունը, որին մենք արդեն այսօրվանից պետք է պատրաստենք մեր քաղաքացիներին` տեխնոլոգիաների զարգացումից առաջացած գործազրկության ֆենոմենից խուսափելու համար»,– ասաց Կարապետյանը:
Նրա խոսքով` համակարգային մոտեցում է պահանջվում, և կրթական համակարգն այստեղ առաջնագծում է:
Կարապետյանը նշեց, որ կառավարությունն արդեն անում է լրացուցիչ քայլեր` զեկույցում նշված մի շարք հարցերի համատեքստում։ Օրինակ՝ ճանապարհային քարտեզի մշակումը նորարար տեխնոլոգիաների կիրառման համար, նոր մեխանիզմների ստեղծում՝ բիզնեսների կողմից նորարար տեխնոլոգիաների ներդրումն ու կիրառումը խթանելու համար և այլն։
Հեղինակները պնդում են, որ զեկույցը համապարփակ պարզաբանում է Հայաստանի տնտեսական ոլորտը, հեղափոխական տեխնոլոգիաների տարածման ազդեցությունը, երկրի համար բացվող հնարավորությունները և այլն։
Զեկույցի հեղինակեների կարծիքով` չորրորդ արդյունաբերական հեղափոխությունը Հայաստանի համար աննախադեպ հնարավորություններ կստեղծի։ Հայաստանը պետք է կենտրոնանա համաշխարհային չափերի տեխնոլոգիական լուրջ խնդիրների վրա` օգտագործելով նորարարական մոտեցումները։
Դրա համար ձևավորվել են բոլոր նախադրյալները. գիտատեխնիկական հետազոտությունների ավանդություններ, Սփյուռքի գործարարական ցանցերը, արագ զարգացող ՏՏ–ոլորտը և աշխարհագրական տեղով պայմանավորված հնարավորությունները։
Այդ հայեցակարգի իրականացման համար պետք է հստակ առանձնացնել առաջնահերթ խնդիրները, մասնավորապես` գիտության և տեխնոլոգիաների ֆինանսավորման զգալի ավելացումը, կրեատիվ և քննադատական մտածողության զարգացումը, բնական գիտությունների և ինժեներային ուսման նոր մոդելները։
Զեկույցը ներառում է կարճաժամկետ, միջնաժամկետ և երկարաժամկետ հեռանկարներով մի շարք նախաձեռնությունների առաջարկներ կրթության խրախուսման մեխանիզմների, ենթակառուցվածքների և ֆինանսավորման ուղղություններով:
