Դալտոնիկ էր նաև հանճարեղ նկարիչ Միխայիլ Վրուբելը։ Ակնաբույժ Էմմա Անտոնյանը Sputnik Արմենիայի «Կաղապարից դուրս» հաղորդման շրջանակում խոսել է դալտոնիզմ հիվանդության մասին։
Ամբողջ աշխարհում ընդունված է համարել, որ դալտոնիզմ հանդիպում է տղամարդկանց 8%-ի և կանանց 0,5% տոկոսի մոտ։ Այս հիվանդությունը չունի էնդեմիկ օջախ, նշանակություն չունի էթնիկ պատկանելությունը կամ մարդու բնակության վայրը, ինչպես մի շարք այլ հիվանդությունների դեպքում է։ Դալտոնիզմն առավել հաճախ հանդիպում է արական սեռի ներկայացուցիչների մոտ, իսկ մորից որդուն փոխանցվելու հավանականությունը 80% է, միևնույն ժամանակ, դստերը փոխանցման հավանականությունը՝ նվազագույն։
Դալտոնիզմը լինում է բնածին և ձեռքբերվի, որպես այլ հիվանդության հետևանք: Այն կարող է ազդել աչքի ցանցաթաղանթի կամ տեսողական նյարդի վրա։
Դալտոնիզմի առավել հաճախ հանդիպող տեսակը գունազգացողության նվազումն է, ընդ որում, դա կարող է լինել մեկ գույնի հանդեպ։ Տարածված կարծիքը, թե դալտոնիկները հակառակ են տեսնում գույները, իրականությանը չի համապատասխանում։ Մեկ գույնի հանդեպ դալտոնիզմ ունենալու դեպքում հիվանդն, օրինակ, կապույտ և կանաչ գույները տեսնում է միևնույն լղոզված երանգով, ոչ թե պարզապես շփոթում դրանք։
Այլ տեսարան է դալտոնիզմի դեպքում մեկից ավելի գույներ կամ միայն սև և սպիտակ տեսնող մարդկանց մոտ։ Վերջինն առավել հազվադեպ հանդիպող է, սակայն նման հիվանդներ կան նաև Հայաստանում։ Հետաքրքրական է, որ շատ քաղաքացիներ իրենց դալտոնիկ լինելու մասին իմանում են բավական ուշ, օրինակ` զորակոչի հետազոտման ժամանակ, ինչը, սակայն, բանակում ծառայելու պարտավորվածությունից չի ազատում։
Լինել դալտոնիկ՝ չի նշանակում ունենել վատ տեսողություն, այս հիվանդությունը վերաբերում է միայն գունաընկալման տարբերությանը, ասում է «Շենգավիթ» բժշկական կենտրոնի ակնաբույժ, օկոլոպլաստիկ վիրաբույժ Էմմա Անտոնյանը։
Այդուհանդերձ, դալտոնիկները մասնագիտության հարցում ունեն որոշ սահմանափակում։ ՀՀ քաղաքացի դալտոնիկներին թույլատրվում է վարել ավտոմեքենա, սակայն տրվում է միայն անձնական տրանսպորտային միջոց վարելու իրավունք։ Դալտոնիկներին արգելված է ընտրել հասարակական տրանսպորտի վարորդի, օդաչուի, գնացքավարի մասնագիտությունները: Այսպես, օրինակ, դալտոնիզմը հայտնի երգիչ Ջորջ Մայքլին զրկեց մանկության երազանքից` դառնալ օդաչու, փոխարենը նվիրելով համաշխարհային ճանաչում ունեցող երգիչ դառնալու հնարավորություն։
Այսօր գիտության զարգացմանը զուգահեռ ստեղծվել են ակնոցներ մեկ կամ երկու գունային դալտոնիզմի ախտորոշման դեպքերի համար։ Ակնոցը օգնում է հիվանդին առավել վառ և տարբեր տեսնել այն գույները, որը չի ընկալում իր աչքը։ Սակայն նույն ակնոցը անկարող է օգնել սև և սպիտակ տեսնող դալտոնիկներին։ Բոլոր դալտոնիկներից միայն 1%-ն է մոնոքրոմատիկ (սև և սպիտակ տեսնող), այսինքն՝ մոտ 2325 մարդուց 1-ը։ Դալտոնիզմը համարվում է անբուժելի հիվանդություն, բայց արդյո՞ք դալտոնիզմը հիվանդություն է, թե աշխարհընկալման այլ տարբերակ։
