Այսօր կառավարության նիստի ժամանակ պարզ դարձավ, որ Գաբրիել Գյոզալյանն ազատվում է Արագածոտնի մարզպետի պաշտոնից, նրան այդ պաշտոնում փոխարինելու եկավ երիտասարդ ՀՅԴ–ական, ՀՅԴ Երևանի քաղաքային կոմիտեի ղեկավար Աշոտ Սիմոնյանը։
Նշանակումից 1–2 ժամ անց Sputnik Արմենիայի հետ զրույցում Աշոտ Սիմոնյանն ասաց, որ օրվա 2–րդ կեսին են իրեն ներկայացնելու մարզում, բայց ամեն դեպքում, ինքն արդեն հասցրել է քիչ թե շատ ծանոթանալ մարզի խնդիրներին, ծանոթ է նաև կառավարության ներկայացրած մարզի զարգացման ռազմավարական ծրագրին։ «Անելիքներն ու խնդիրները շատ են, պատրաստ եմ աշխատել»,–ասում է Սիմոնյանը։
Ծննդով Արագածոտնի մարզի Կաթնաղբյուրցի մարզպետի ծնողները հիմա էլ այնտեղ են ապրում։ Նրա կապերը մարզի հետ ամենօրյա են, ասում է, որ ծանոթ է մարզի խնդիրներին և զարգացման հեռանկարներին։
«Ինձ համար կարևոր է, որ մարզում և, ընդհանրապես, երկրում պետական պաշտոնյան լինի և ընկալվի այնպես, ինչպես ես եմ կարծում, այսինքն`լինի շփվող, ժողովրդի միջից, ժողովրդի դարդ ու ցավը լսող, կիսող։ Նաև ինձ համար կարևոր է մարզում դրական մթնոլորտի վերականգնումը։ Մարզի բնակիչը` գյուղացին, քաղաքացին պիտի զգա, տեսնի, հասկանա, որ պետական պաշտոնը ոչ թե բարիք է, որից պաշտոնյան պիտի օգտվի, այլ ծանր պատասխանատվություն, որով պիտի կիսի ժողովրդի խնդիրները»,–նշում է Սիմոնյանը։
Նորանշանակ մարզպետի խոսքով` Արագածոտնի նախորդ մարզպետն իր կուսակցական ընկերն է, իրենք լավ հարաբերությունների մեջ են։ «Վերջերս հանդիպել, խոսել ենք խնդիրներից, անելիքներից, պիտի շարունակեմ այն կիսատ գործը, որ նա թողել է»,–ավելացրեց Աշոտ Սիմոնյանը։
Հիշեցնենք, որ այսօր` հուլիսի 13–ին, կառավարության նիստին ՀՀ տարածքային կառավարման և զարգացման նախարարի տեղակալ Վաչե Տերտերյանը նախ ներկայացրեց Գաբրիել Գյոզալյանին Արագածոտնի մարզպետի պաշտոնից ազատելու մասին, ապա՝ Աշոտ Սիմոնյանին Հայաստանի Հանրապետության Արագածոտնի մարզպետ նշանակելու մասին որոշման նախագծերը: Աշոտ Սիմոնյանը ՀՅԴ Երևանի քաղաքային կոմիտեի ղեկավարն է, երիտասարդ կուսակցական։ Վերջին խորհրդարանական ընտրություններում նա առաջադրված էր ՀՅԴ համամասնական ցուցակով։
