ԵՐԵՎԱՆ, 13 հուլիսի — Sputnik, Խաչիկ Չախոյան. «Հանդիման ընթացքում մեկ ֆուտբոլիստի՝ ԲԱՏԷ-ի պաշտպան Ալեքսեյ Ռիոսին, հաջողվեց երկու անգամ դառնալ գոլի հեղինակ: Առաջ մղելով բելառուսական թիմին՝ Ռիոսը դարձավ ինքնագոլի հեղինակ երկրորդ խաղակեսում:
Առաջին խաղակեսում ԲԱՏԷ-ն մեծ առավելություն ուներ մեր չեմպիոնի նկատմամբ, ու վտանգավոր պահերը հաջորդում էին իրար: Որոշ դեպքերում վստահ էր խաղում դարպասապահ Արսեն Բեգլարյանը, որոշ դրվագներում էլ ԲԱՏԷ-ի ֆուտբոլիստները դիպուկ հարված չէին կարողանում կատարել: Բայց ընդմիջման գնալուց երեք րոպե առաջ դաշտի տերերին հաջողվեց առաջ անցնել հաշվի մեջ: Ալեքսեյ Ռիոսը գլխի հարվածով բացեց հաշիվը:
Դժվար էր պատկերացնել, որ նման խաղակեսից հետո «Ալաշկերտին» կհաջողվի խուսափել պարտությունից: Բայց երկրորդ կեսում մեր թիմը անհամեմատ լավ խաղաց ու կարողացավ նույնիսկ առանց դիպուկ հարվածի խաղադաշտը թողնել չպարտված: Արտակ Դաշյանի եզրային փոխանցումից հետո դարպասապահը հետ մղեց գնդակն ու այն դիպավ Ալեքսեյ Ռիոսին ու հայտնվեց ԲԱՏԷ-ի դարպասում:
Հանդիպման մնացած ժամանակահատվածում «Ալաշկերտն», արդեն գրագետ գործելով պաշտպանությունում, պահպանեց իրեն ձեռնտու հաշիվը պատասխան խաղից առաջ: Մրցակցի հարկի տակ խփած գնդակը շատ լավ հնարավորություն է տալիս մեր չեմպիոնին հաջորդ փուլ դուրս գալու համար: Սակայն այն ապահովելու համար ևս մեկ խաղ պետք է անցկացնել, ու եթե մենք կարողանանք անառիկ պահել մեր դարպասը, անկախ նրանից՝ գոլ կխփենք թե ոչ, որակավորման երրորդ փուլը իրականություն կդառնա:
