ԵՐԵՎԱՆ, 11 հուլիսի — Sputnik. Չորս մարզիկ և մեկ մեդալ. Ալի Ալիևի հուշամրցաշարում միայն Գեորգի Կետոևին էր հաջողվել երրորդ տեղ զբաղեցնել:.
«Իմ նպատակն աշխարհի առաջնությունից առաջ ըմբիշների հնարավորությունները տեսնելն էր: Տղաներից ամեն մեկն իր սխալներն ունի` ֆիզիկական, տեխնիկական: Նրանք պատրաստ չեն տարվա գլխավոր ստուգատեսին: Իսկ մենք աշխարհի առաջնության չենք մեկնելու միայն մասնակցության համար»,- ՀԱՕԿ լրատվականի հետ զրույցում նշել է Ազատ ոճի ըմբշամարտի հավաքականի գլխավոր մարզչի պաշտոնակատար Հաբեթնակ Կուրղինյանը:
Նա նշել է, որ այսօր աշխարհի առաջնությունում սպասելիքներ ունի այն ըմբիշներից, որոնք միջազգային մրցաշարերում կամ Եվրոպայի առաջնությունում մրցանակային տեղ են զբաղեցրել: Մարզչի խոսքով՝ մյուսները պետք է շատ աշխատեն և ավելի պատասխանատվությամբ մոտենան մրցումներին:
Նարեկ Սիրունյանը ևս պետք է հանդես գար հուշամրցաշարում: Սակայն ըմբիշը վնասվածքի պատճառով այն բաց թողեց: Սիրունյանի մասնակցությունը հարցականի տակ է նաև աշխարհի առաջնությունում.
«Թիմի կազմը պարզ կդառնա վերջին հավաքից հետո: Շատ լավ կլինի, որ մեր բոլոր ըմբիշները կարողանան մասնակցել Մ 23 տարեկանների Եվրոպայի առաջնությանը: Այս փորձն աշխատեց Վալոդյա Ֆրանգուլյանի և Գրիգոր Գրիգորյանի դեպքում: Մ 23 տարեկանների Եվրոպայի առաջնությունում Ֆրանգուլյանը չեմպիոն էր դարձել, իսկ Գրիգորյանը փոխչեմպիոն: Նրանք զգացին, որ կարող են հաղթել նաև մեծահասակների պայքարում»,- ասել է Հաբեթնակ Կուրղինյանը:
Ալի Ալիևի հուշամրցաշարին մասնակցում էին Գարիկ Բարսեղյանը (57 կգ), Վալտեր Մարգարյանը (70 կգ), Վահե Թամրազյանը (86 կգ) և Գևորգի Կետոևը (97 կգ):
Հուլիսի 15-ին հավաքականը կմեկնի Կիսլովոդսկ, որտեղ Ռուսաստանի ընտրանու հետ համատեղ հավաք կանցկացնի:
