ԵՐԵՎԱՆ, 12 հուլիսի — Sputnik. Հայկական պատվիրակությունները միջազգային կազմակերպություններում կբարձրացնեն Ադրբեջանի կողմից ահաբեկիչներին զենք մատակարարելու հարցը, Sputnik Արմենիա մամուլի կենտրոնում ասաց ԱԺ փոխխոսնակ Էդուարդ Շարմազանովը։
Ավելի վաղ «Տրուդ» բուլղարական թերթի տրամադրության տակ փաստաթղթեր էին հայտնվել, որոնք վկայում էին, որ «Մետաքսե ճանապարհ» ադրբեջանական ավիաընկերությունը դիվանագիտական ծածկի ներքո օգտագործվում է ամբողջ աշխարհով ահաբեկչական կազմակերպություններին զենք մատակարարելու համար, այդ թվում նաև Իսլամական պետությանը։
Նրա խոսքով` այդ հարցը շատ կարևոր է ահաբեկչության դեմ պայքարի համատեքստում։
«Հայաստանի Հանրապետությունը պետք է գործուն քայլեր ձեռնարկի այս խնդիրները միջազգային հանրությանը ներկայացնելու համար: Մեր պատվիրակություններն այս հարցին շատ լուրջ ուշադրություն են դարձնելու… ապրիլյան դեպքերն էլ ցույց տվեցին այդ պետության բարբարոսությունը», – ասաց Շարմազանովը` հիշեցնելով խաղաղ բնակիչների սպանությունն ու հայ զինվորների դիերի խոշտանգումները։
Նրա խոսքով` կենդանի վահանի օգտագործման, զոհված երեխային օգտագործելու փորձը էժանագին հեղինակություն ձեռք բերելու համար բումերանգի էֆեկտ է ունենալու։
Բուլղարական թերթում նշվում է, որ 2016 թվականին Ադրբեջանը մեղադրել էր Հայաստանին Լեռնային Ղարաբաղում ընթացող մարտերի ընթացքում «սպիտակ ֆոսֆոր» կիրառելու մեջ, այն դեպքում, երբ այդ նյութի տասնյակ, եթե ոչ հարյուրավոր տոննաներ անցել են Բաքվով։ Փաստաթղթերը ցույց են տալիս, որ «սպիտակ ֆոսֆորը» Ադրբեջան էր բերվել 2016 թվականին։
