ԵՐԵՎԱՆ, 11 հուլիսի — Sputnik. Մոսկվայի Դմիտրիևսկի խճուղում գտնվող «Ռիո» կենտրոնում նախօրեին բռնկած հրդեհից հետո որոշվել է ժամանակավորապես փակել այն։ Հայտնի է, որ կենտրոնը պատկանում է «Տաշիր» ընկերությանը։ Այս մասին հայտնում է «Մոսկվա» գործակալությունը։
Ընկերության ղեկավարությունը որոշում է ընդունել այցելուների համար փակել առևտրի կենտրոնը, քանի դեռ չեն պարզվել հրդեհի իրական պատճառները։
«Երեկ հրդեհ է բռնկվել Դմիտրիևսկի խճուղում գտնվող «Ռիո» կենտրոնում, որի պատճառը դեռևս հայտնի չէ։ Այրվել է 1000 քմ տարածք։ Այժմ առևտրի կենտրոնը փակ է, ուսումնասիրվում են կատարվածի պատճառները, կատարվում է հրդեհի հետևանքների վերացում, ինչից հետո այն դարձյալ կբացի իր դռները այցելուների առջև։ Բոլոր տուժածներին տրվել է և կտրվի անհրաժեշտ օգնություն»,- հայտարարել է «Տաշիր» ընկերության մամուլի ծառայությունը։
Նշենք, որ հրդեհի հետևանքով տուժել է 18 մարդ, որոնց` թվում մեկ երեխա և ԱԻՆ-ի մեկ աշխատակից։
