ԵՐԵՎԱՆ, 10 հուլիսի — Sputnik. Ռուսաստանի ԱԳՆ-ն 2 անգամ կոշտ հայտարարություն տարածեց ծագումով հայ ՌԴ քաղաքացիների հանդեպ Ադրբեջանի դրսևորած խտրական վերաբերմունքի անթույլատրելիության վերաբերյալ, որով արգելվում է նրանց մուտքն Ադրբեջան։
ԱԺ փոխխոսնակ Էդուարդ Շարմազանովը դրական է գնահատում Մոսկվայի դիրքորոշմանը Ադրբեջանի «վայրի» քաղաքականության կապակցությամբ։
«Ադրբեջանի ԱԳՆ արձագանքը պաշտոնական Մոսկվայի հայտարարությանը հստակ ցույց է տալիս, որ ռուս-ադրբեջանական հարաբերություններում ինչ-որ մի սև կատու է անցել։ Չեմ կարողանում դեռ բացատրել՝ ինչն է պատճառը, բայց դա հստակ երևում է և՛ Զախարովայի հայտարարությունից, և՛ պաշտոնական Բաքվի արձագանքից»,- ասաց Շարմազանովը։
Ըստ նրա՝ Բաքուն շատ ավելի նյարդային է, նեղացած, և դա թույլ է տալիս ենթադրել, որ, եթե նման մակարդակի պաշտոնական հայտարարություններ են հնչում, այդ թվում՝ նաև Մոսկվան հնչեցնում է ազգությամբ հայ ՌԴ քաղաքացիների նկատմամբ ադրբեջանական ոչ բարեհաճ վերաբերմունքի մասին, ապա դա խոսում է այն մասին, որ միգուցե ռուս-ադրբեջանական ստվերային որոշ պայմանավորվածություններ կամ խոստումներ չեն իրականացել:
«Փաստն այն է, որ նրանք փորձեցին երեխայի այս սպանությունը շոու սարքել և որևէ ադրբեջանամետ հայտարարություն չեղավ»,- նշեց Էդուարդ Շարմազանովը։
Ադրբեջանը կեղծ քարոզչություն է տանում, որին Ռուսաստանը ոչ միայն տուրք չի տալիս, այլև ՌԴ ԱԳՆ-ն հայտարարություն է տարածում՝ մեղադրելով Ադրբեջանին իր ծագումով հայ քաղաքացիների նկատմամբ խտրական վերաբերմունքի մեջ, նկատեց նա։
