ԵՐԵՎԱՆ, 9 հուլիսի — Sputnik. Հայաստանը ներկայացնող Սյուզաննա Մելքոնյանը զբաղեցրել է պատվավոր առաջին հորիզոնականը։ Նա եզրափակիչ փուլում կատարել է կոմպոզիտոր, ՀՀ մշակույթի վաստակավոր գործիչ Էդգար Գյանջումյանի «Սիրո թևեր» հայտնի երգը, որն արժանացել «Լավագույն երգ ծովի մասին» անվանակարգում հաղթողի կոչմանը։ Այս մասին հայտնում է Հայաստանի կոմպոզիտորների միության մամուլի ծառայությունը:
«Սիրո թևեր» երգը, որը գրվել է դեռ 2002 թվականին, կատարել են բազամթիվ արտիստներ, այդ թվում՝ Աննա Խաչատրյանը, Սոնա Ռուբենյանը, Սոնա Շահգելդյանը, Արսեն Սաֆարյան-Լիանա դուետը։
«15 տարի առաջ այնպիսի հոգեվիճակ էր, որ ուզում էի մեկին սիրել, նվիրվել։ Հետաքրքիր հոգեվիճակ էր, որն ամբողջական դարձավ այս երգի միջոցով։ Հետո դիմեցի Վահան Անդրեասյանին, ներկայացրեցի այն հույզերը, որոնք կան և արդյունքում ստացվեց այս երգը»,- նշել է Էդգար Գյանջումյանը։
Անդրադառնալով «Морской узел 2017» մրցույթում Սյուզաննայի կատարմանը, կոմպոզիտորն ասել է՝ երբ երգչուհու ներկայացուցիչները կապ են հաստատել իր հետ, որպեսզի կատարեն այս երգը, մեծ ուրախությամբ համաձայնել է։
«Իսկապես, շատ հաճելի է, երբ քո երգը, որը գրվել է 15 տարի առաջ, շարունակում է հնչել, սիրվել և միջազգային հարթակում արժանանալ գնահատականի»,- ասել է կոմպոզիտորը։
Նա շնորհավորել է Սյուզաննա Մելքոնյանին գեղեցիկ կատարման համար ու մաղթել նորանոր հաջողություններ։
