ԵՐԵՎԱՆ, 8 հուլիսի — Sputnik. Հայաստանի շախմատային ֆեդերացիայի հաշվետու-ընտրական կոնֆերանսի ժամանակ գրոսմայստեր Գաբրիել Ղազարյանը կարծիք հայտնեց, որ շախմատի դպրոցների առատությունը հանգեցնում է մի իրավիճակի, երբ գրոսմայստերները դառնում են մարզիչներ: Դա, նրա գնահատմամբ, ճիշտ չէ: Ի պատասխան ՀՀ նախագահ, շախմատային ֆեդերացիայի նախագահ Սերժ Սարգսյանն ասաց, որ իր նպատակն է ունենալ հինգ լավ գրոսմայստեր, բայց նաև շախմատիստի պես մտածող հիսուն հազար մարդ:
«Շախմատը սովորեցնում է արդար հաղթել ու արդար պարտվել: Եթե մեր հանրության մի մասը, շատ չեմ ասում, գոնե հինգ տոկոսը այդ տրամաբանությամբ շարժվի, մեր երկիրը երեխաների համար բոլոր պայմանները ստեղծելու մեծ հնարավորություն է ունենալու: Շախմատը նաև Հայաստանի զարգացման տեսանկյունից եմ ես նայում»,-ասաց երկրի ղեկավարը:
Հանդիպման ժամանակ Սարգսյանը հարկ համարեց տեղեկացնել, որ արդեն ժամանակն է ունենալ շախմատի գիտահետազոտական ինստիտուտ:
«Կարծում եմ՝ այդ խնդիրն էլ կլուծենք, որպեսզի համակողմանի պատրաստենք մեր մարզիկներին»,-ասաց Սերժ Սարգսյանը:
Այսօր տեղի ունեցան նաև Շախմատի ֆեդերացիայի ղեկավար մարմինների՝ նախագահի և նախագահության կազմի ընտրությունները: Հայաստանի շախմատային ֆեդերացիայի նախագահի պաշտոնում միաձայն վերընտրվեց Հայաստանի Հանրապետության նախագահ Սերժ Սարգսյանը:
Ընտրություններից հետո կայացավ Հայաստանի շախմատային ֆեդերացիայի նորընտիր նախագահության առաջին նիստը:
