ԵՐԵՎԱՆ, 8 հուլիսի — Sputnik. ՀՀ նախագահ Սերժ Սարգսյանն այսօր` հուլիսի 8-ին, շնորհավորական ուղերձ է հղել Ռուսաստանի Դաշնության ժողովրդական արտիստ, կինոռեժիսոր Կարեն Շահնազարովին ծննդյան 65-րդ տարեդարձի առթիվ՝ մաղթելով հոբելյարին քաջառողջություն և նորանոր ստեղծագործական նվաճումներ: Այս մասին հայտնում է ՀՀ նախագահի մամուլի ծառայությունը։
«Դուք կինոյի մեծագույն վարպետներից եք՝ հռչակավոր ռեժիսոր և պրոդյուսեր, որի ֆիլմերը բարձր են գնահատվել թե՛ հանդիսատեսի, թե՛ կինոգետների կողմից: Ուրույն ձեռագրով ստեղծված Ձեր ֆիլմերը խորհրդային և ռուսական կինոյի տարեգրության փայլուն էջերից են»,- նշված է Սերժ Սարգսյանի շնորհավորական ուղերձում:
Նախագահն անդրադարձել է Կարեն Շահնազարովի արվեստին` նշելով, որ այն սիրված և սպասված է Հայաստանում, իսկ նրա հասարակական գործունեությունը, հայ-ռուսական մշակութային կապերի ամրապնդմանն ուղղված ջանքերը դրվատանքի և բարձր գնահատանքի են արժանի:
