ԵՐԵՎԱՆ, 8 հուլիսի — Sputnik. Ղարաբաղում իրավիճակի հերթական սրացումով Ադրբեջանը փորձում է դիվանագիտական ծածկի ներքո շեղել ուշադրությունը զենքի ապօրինի ներկրման հետ կապված սկանդալից, Sputnik Արմենիայի հետ զրույցում ասաց քաղաքագետ Սուրեն Սարգսյանը:
Քաղաքագետը համոզված է, որ Ադրբեջանում տիրող ներքաղաքական իրավիճակի և Ղարաբաղում շփման գծի երկայնքով բռնության աճի միջև որոշակի օրինաչափություն կա։
«Ամեն անգամ, երբ այդ երկրի իշխանությունները հայտնվում են սկանդալի կենտրոնում, Ադրբեջանը դիվերսիայի է դիմում: Բավական է հիշել Պանամայի սկանդալն ու 2016 թվականի ապրիլին Ղարաբաղյան հակամարտության գոտում լայնածավալ ռազմական գործողությունները», — ասաց Սարգսյանը:
Մի քանի օր առաջ բուլղարական «Տրուդ» թերթում փաստաթղթեր էին հայտնվել, որոնք վկայում էին, որ «Մետաքսե ճանապարհ» ադրբեջանական ավիաընկերությունը օգտագործվում է ամբողջ աշխարհով մեկ ահաբեկիչներին զենք մատակարարելու նպատակով, այդ թվում՝ «Իսլամական պետությանը»՝ դիվանագիտական անձեռնմխելիության քողարկմամբ։
Փորձագետը համոզված է, որ հենց այս տրամաբանությամբ էլ պայմանավորված է ղարաբաղյան հակամարտության գոտում իրավիճակի վերջին սրացումը,: Խոշոր սկանդալի կենտրոնում հայտնված Ադրբեջանի իշխանությունները որոշել են հերթական սադրիչ գործողությունների դիմել Ղարաբաղում:
Սարգսյանի կարծիքով` Վիեննայում և Պետերբուրգում ձեռք բերված պայմանավորվածությունների անտեսումը ևս մեկ անգամ փաստում է, որ Ադրբեջանը չի ցանկանում հակամարտությունը թողնել սառեցված վիճակում:
«Եթե միջադեպերի ուսումնասիրման մեխանիզմները կիրառվեն շփման գծի ողջ երկայնքով, ապա տեղեկությունն այն մասին, որ հենց պաշտոնական Բաքուն է դիմում ագրեսիայի, լիարժեք հասանելի կլինի միջազգային հանրությանը», — ասաց նա:
Սարգսյանն անդրադարձավ նաև Մինսկի խմբի անհասցե հայտարարություններին։
«Պետք չէ Մինսկի խումբը դիտարկել որպես ինչ-որ պատժիչ մարմին: Նրա առաքելությունը կողմերի համար ընդունելի փոխզիջման տարբերակ գտնելն է», — նշեց քաղաքագետը:
Ավելի վաղ հայտնել էինք, որ Ադրբեջանի ԶՈՒ-ն նախորդ տարվա ապրիլյան ռազմական գործողություններից հետո առաջին անգամ շփման գծում կիրառել է ՏՌ-107 տիպի համազարկային հրթիռային կայանքներ՝ հարվածի թիրախ դարձնելով այդ ուղղությամբ տեղակայված հայկական բնագծերը: Վերոնշյալ հրթիռային կայանքները տեղակայելով Ալխանլու գյուղի մերձակա տարածքում, իր սովորության համաձայն, ադրբեջանական զինուժը պատսպարվել է խաղաղ բնակչության թիկունքում՝ վերջինիս օգտագործելով որպես կենդանի վահան՝ այդ կերպ կոպտորեն խախտելով միջազգային իրավունքի նորմերը: Օգտվելով պաշտպանվելու իր լիարժեք իրավունքից, հակառակորդի՝ խաղաղ բնակավայրին մերձակա տարածքում տեղակայված կրակակետը լռեցնելու համար, ՊԲ-ի առաջապահ զորամասերը հարկադրված են եղել դիմելու պատասխան գործողությունների: Պաշտպանության բանակը շփման գծի ողջ երկայնքով շարունակում է հանդես գալ իրավիճակ թելադրողի դերում և վստահորեն իրականացնել իր առջև դրված մարտական խնդիրը:
Ադրբեջանի սադրիչ գործողությունների ընթացքում տեղի ունեցած միջադեպի հետևանքով երկու քաղաքացիական անձ է մահացել, որոնցից մեկը` երկու տարեկան երեխա:
