ԵՐԵՎԱՆ, 7 հուլիսի — Sputnik. Հայաստանի պաշտպանության նախկին նախարար Սեյրան Օհանյանը հերքում է ադրբեջանական մի շարք կայքերում իր անունից տարածվող տեղեկությունը, թե հուլիսի 6-ին արցախա-ադրբեջանական սահմանին հայ զինծառայող է զոհվել:
Ադրբեջանական լրատվամիջոցները տարածել էին Սեյրան Օհանյանի լուսանկարով կեղծ էջ, որում ռուսերեն տեղեկացվել է, թե, իբր, ադրբեջանցիների հետ մարտի ժամանակ հայ զինծառայող է զոհվել:
Հիշեցնենք, որ փորձագետներն արդեն իսկ նախազգուշացրել են, որ ադրբեջանցիները Razm.info Official կեղծ էջ էին ստեղծել՝ Razm.Info-ի նկարներով, տեքստերով, 25000 ընթերցող հավաքել։ Դժվարությամբ հաջողվել է փակել այդ կեղծ էջը։
Հիմա էլ կեղծ էջեր են ստեղծել Seyran Ohanyan Official, Serge Sargsyan official անվանումներով, երկար ժամանակ ինչ-որ լուսանկարներ ու հայերեն նորմալ տեքստեր են դրել, իսկ հետո սկսել նրանց անունից ապատեղեկատվություն տարածել։
