ԵՐԵՎԱՆ, 6 Հուլիս — Sputnik. ՀՆԱ-ի միջին 5.3% կանխատեսվող աճը հիմնականում պայմանավորված կլինի ծառայությունների և արդյունաբերության ճյուղերով: Սա կառավարության միջնաժամկետ ծրագրի ակնկալիքն է։
«2017 թվականի համար կանխատեսվում է 3.3%, իսկ 2018-2020 թվականներին, համապատասխանաբար, 4.7%, 5.4% և 5.7 % տնտեսական աճ։ Միջնաժամկետ ծրագրի ներդրմամբ կլուծվեն մի շարք խնդիրներ, ինչպիսիք են մակրոտնտեսական հաշվեկշռվածությունը, այդ թվում նաև միջոցների իրատեսական և համապարփակ փաթեթի ձևավորումը»,– ասաց ֆինանսների նախարար Վարդան Արամյանը։
Նրա խոսքով` «Պետական ծախսերի միջնաժամկետ ծրագրումը հնարավորություն է տալիս մեղմել հասանելի բյուջետային միջոցների և պահանջվող ծախսերի միջև հնարավոր անհամապատասխանությունը։
Կառավարությունը նախատեսում է 2018–2020 թվականներին ծախսերի տարեկան միջին մակարդակը պահպանել ՀՆԱ–ի 26,1–ից 25,7 տոկոսի սահմանում։ Իսկ ՀՆԱ–ի նկատմամբ պետական եկամուտների հարաբերակցության ցուցանիշը կտատանվի 23,4–ից 23,6 տոկոսի սահմանում։
