ԵՐԵՎԱՆ, 5 հուլիսի — Sputnik. Այսօր վարչապետ Կարեն Կարապետյանը շնորհավորել է հայրենակիցներին Սահմանադրության օրվա առթիվ։
«22 տարի առաջ այս օրն ընդունվեց Հայաստանի Հանրապետության Սահմանադրությունը: Այդ փաստաթուղթը ոչ միայն խորհրդանշում էր մեր նոր պետականությունը, այլև ամուր հիմքեր սահմանում Հայաստանի կառուցման և սահմանադրականության ձևավորման ու զարգացման համար: Սահմանադրության դերն անգնահատելի է մեր երկրի՝ որպես ժողովրդավարական, իրավական և սոցիալական պետության կայացման հարցում»,-մասնավորապես նշել է վարչապետը։
Ինչպես Կարեն Կարապետյանն է նշել, սահմանադրական բարեփոխումների իրացման ճանապարհին բոլորս մեծ անելիքներ ունենք:
«Վստահ եմ, որ պետք է առաջնորդվենք այն գաղափարով, որ Սահմանադրության գերակայության ապահովումն ու լիարժեք կիրառումը կախված է ինչպես իշխանությունից, այնպես էլ յուրաքանչյուր քաղաքացուց: Բոլորս պետք է պատասխանատվության զգացում ունենանք մեր երկրի ապագայի նկատմամբ ու ամեն օր աշխատենք այդ ապագան ավելի լավը դարձնելու համար»,-ընդգծել է գործադիրի ղեկավարը։
Վարչապետն իր ուղերձում վստահեցրել է, որ Սահմանադրության և իրավունքի գերակայության ապահովման գործում իրենք լուրջ վճռականություն ունեն:
