ԵՐԵՎԱՆ, 5 հուլիսի–Sputnik. Գյուղատնտեսության նախարարի տեղակալ Ռոբերտ Մակարյանն ընդունել է Իրանի գյուղատնտեսական սարքավորումներ արտադրողների ասոցիացիայի փոխնախագահ Հոսսեյն Ռոուզաթիի գլխավորած պատվիրակությանը։ Հանդիպմանը ներկա էին նաև ագրոտեխնիկայի արտադրությամբ զբաղվող ընկերությունների ներկայացուցիչներ:
«Մեր այցի նպատակն է՝ գործարար կապեր հաստատել տեղական արտադրողների հետ իրանական ագրոտեխնիկայի մատակարարման և նորագույն տեխնոլոգիաների ներմուծման նպատակով, ինչպես նաև ծանոթանալ Հայաստանի գյուղատնտեսության ոլորտում կիրառվող տեխնիկային և հարակից սարքավորումներին, դրանց հզորություններին»,- ասել է ասոցիացիայի փոխնախագահ Հոսսեյն Ռոուզաթին:
Ռոբերտ Մակարյանն հյուրերին առաջարկել է ուսումնասիրել նաև լիզինգային եղանակով գյուղատնտեսական տեխնիկայի ձեռքբերման և մեքենա-տրակտորային կայանի (ՄՏԿ) ստեղծման ծրագրերում ընդգրկվելու հնարավորությունը:
Նախարարի տեղակալը հնարավոր է համարել նաև իրանական ագրոտեխնիկայի նմուշների ներկայացումը հոկտեմբերին Երևանում կայանալիք «Արմպրոդէքսպո» ցուցահանդեսին, ինչը, Ռոբերտ Մակարյանի համոզմամբ, հնարավորություն կընձեռի հայ ֆերմերներին տեղում ծանոթանալ արտադրանքին:
Որպեսզի իրանական զուսատեխնիկան հայկական շուկայում լինի մրցունակ և ունենա պահանջարկ` Ռոբերտ Մակարյանն ընդգծել է բարձր որակի և մատչելի գների ապահովման կարևորությունը:
Հանդիպման ընթացքում քննարկվել է նաև ագրոտեխնիկայի հավաքման համատեղ կենտրոնի ստեղծման հնարավորությունը: